قازاقستاننىڭ ءانۇرانىنىڭ اۆتورى جامبىل وڭىرىندەگى دۋنگانوۆكا اۋىلىندا تۇرعان - فوتو
«بۇرىن دۋنگانوۆكا دەپ اتالعان جالپاق توبە اۋىلىندا 9 مىڭنان استام ءتۇرلى ۇلت وكىلى تۇرادى. ولاردىڭ ىشىندە وبلىس جانە رەسپۋبليكاعا تانىمال ادامدار بار»، - دەدى «ۋىنحۋا» دۇنگەن مادەني ورتالىقتار قاۋىمداستىعىنىڭ پرەزيدەنتى رۋسلان يسمازوۆ.
«ۆالس كورولى»، بەلگىلى قازاقستاندىق كومپوزيتور ءشامشى قالداياقوۆ 1980-جىلداردىڭ باسىندا دۋنگانوۆكا اۋىلىندا تۇرعان. ول تۇرعان كوشە قازىر كومپوزيتوردىڭ ەسىمىمەن اتالادى.
دۋنگانوۆكادا ول دۇنگەن قىزىنا عاشىق بولىپ، وعان «دۇنگەن قىزى» ءانىن ارنادى. بۇل ءاندى دۇنگەننىڭ ۇل-قىزدارى ءتۇرلى جيىنداردا ايتىپ جۇرەدى. بۇل اۋىلدا ش. قالداياقوۆ كوپشىلىككە بەلگىلى «مەنىڭ ەلىم»، «فوسفورلى جامبىل»، «وتان»، «مويىنقۇمدا»، «بارىنەن دە سەن سۇلۋ»، «قايداسىڭ»، «قىز ساعىنىشى» جانە ت. ب اندەرىن جازعان.
كومپوزيتوردىڭ تۋعان كۇنى قارساڭىندا جالپاق توبە اۋىلىنىڭ تۇرعىندارى ش. قالداياقوۆ كوشەسىن اباتتاندىردى.
62 ءۇيدىڭ قابىرعاسىنا «ءشامشى قالداياكوۆ اتىنداعى كوشە» جازىلعان بەلگىلەر ورناتىلدى، №2 ءۇيدىڭ قابىرعاسىندا قازاق، ورىس جانە دۇنگەن تىلدەرىندە «ش. قالداياقوۆ جالپاق توبە اۋىلىنىڭ قۇرمەتتى ازاماتى» مەموريالدىق تاقتاسى اشىلدى.
«بۇل ۇيدە ءشامشى قالداياقوۆ تۇرعان»، - دەدى ر. يسمازوۆ.
قازاقستاننىڭ بەلگىلى سۋرەتشىسى مۋحامات-ۋمار پانشايەۆ وسى اۋىلدا تۇرادى. ونىڭ تۋعان اۋىلىنا ارنالعان كارتينالارى الەمدەگى گالەرەيالارعا قويىلعان. سولاردىڭ ىشىندە «ەسەككە مىنگەن بالا»، «كەلىن»، «تاڭ» جانە ت. ب. تۋىندىلارى بار.
