جوحار سارنايەۆقا ءولىم جازاسى تاعايىندالۋى مۇمكىن

استانا. قازاقپارات - بوستون مارافونى ىسىندەگى باس ايىپتالۋشى جوحار سارنايەۆ ءوزىنىڭ قىلمىسى ارقىلى قاساقانا امەريكانى جازالاعىسى كەلگەن.

پروكۋروردىڭ ورىنباسارى ەلوك چاكراۆارتي وسىلاي دەدى.

بۇل تۋرالى «ۆەدوموستي» گازەتى حابارلادى.

ايىپتاۋشى تاراپتىڭ تۇسىندىرۋىنشە، ج. سارنايەۆ جيھادشىلاردى وياتپاق بولىپتى. الايدا، الداعى ۋاقىتتا قورعاۋشى جاقتىڭ دا ءسوزى تىڭدالادى. سونان كەيىن عانا سوت ۇكىمى شىعادى.

بوستونداعى جارىلىسقا كىنالى دەپ سانالعان سارنايەۆقا جالپى 30 ايىپ تاعىلىپ وتىر.

تاعى ءبىر ايتا كەتەر جايت، جاۋاپكەردىڭ قورعاۋشىسى جوحاردىڭ كىناسىن مويىندايتىندىعى تۋرالى مالىمدەگەنى بەلگىلى. ول اعاسى تەمىرلاننىڭ ايتقانىمەن جۇرگەن، دۇرىسى تۋىسىنىڭ سوڭىنا ىلەسكەن.

ەگەر سوت جوحار سارنايەۆتى كىنالى دەپ ساناسا، وندا سوت وتىرىسىنىڭ ەكىنشى كەزەگى باستالىپ، تاراپتاردان قايتادان سۇراق-جاۋاپ الىنادى.

جالپى، سارنايەۆتى ءولىم جازاسى نەمەسە شارتتى مەرزىمىنەن بۇرىن بوساتۋ قۇقىعىنسىز ءومىر بويىنا باس بوستاندىعىنان ايىرۋ ۇكىمى تاعايىندالۋى ىقتيمال.

«ەگەمەن قازاقستان»