دوستىقتارى جاراسقان ونەر جۇلدىزدارى - فوتو

استانا. قازاقپارات - ادەتتە شوۋ- بيزنەس الەمىندەگى جۇلدىزداردىڭ اراسىندا دوستىقتان گورى قىزعانىش، اياقتان شالۋ باسىم بولادى دەپ جاتادى.

ءبىر ساحنادا ءجۇرىپ ءبىر- بىرىنە كۇلىپ قاراعانىمەن ءبىرىنىڭ سىرتىنان ءبىرى عايباتتاپ جاتاتىن ونەر ادامدارىن دا كورىپ ءجۇرمىز. بىرەۋدىڭ اتاق- داڭقىن قىزعانىپ، ەندى بىرەۋدىڭ تاپقان تيىن- تەبەنىن ساناۋ ابىروي اپەرمەيدى، ارينە. قاراپايىم حالىق ءۇشىن ساحنادا جۇرگەن ونەر ادامدارىنىڭ ادامگەرشىلىكتەرى، رياسىز كوڭىلدەرى، ادالدىقتارى ۇلگى- ونەگە. سوندىقتان بۇگىن دوستىقتارى جاراسقان، ونەردە دە، ومىردە دە ءبىر- بىرىنە تىلەۋلەس جۇلدىزداردى نازارلارىڭىزعا ۇسىنامىز.

 «100 تەڭگەڭ بولعانشا ءجۇز دوسىڭ بولسىن» دەگەندى بەرىك ۇستانعان انشىلەردىڭ ءبىرى روزا ءالقوجا. حالىقتىڭ ەرەكشە ىقىلاسىنا بولەنگەن سۇيكىمدى ءانشى، باتىر انا روزانىڭ دوسى وتە كوپ ەكەن. دەگەنمەن كوپ دوسىنىڭ ىشىندە ءانشىنىڭ جانىنا جاقىن تارتاتىن ەرەكشە جاندار بار. روزا قازاق ەستراداسىندا ورنى بولەك بايسالدى ءانشى ەركىن نۇرجانوۆپەن ەرەكشە دوس. ولار ءتىپتى وتباسىمەن ارالاسادى. ەركىن مەن ونىڭ جۇبايى دينارا روزا مەن ايدىننىڭ بالاسى ەلارىستىڭ كىندىك اتا- اناسى. سونداي- اق روزا بەلگىلى ءانشى سايات مەدەۋوۆپەن قازاقتىڭ سالتى بويىنشا جىلىك ۇستاسقان اعايىنداس. ياعني، سايات روزا ءۇشىن ونەردەگى عانا ەمەس، ومىردەگى ەتجاقىن اعاسى. نازىكجاندى بولسا دا ەرمىنەزدى روزا تەك ەر- ازاماتتارمەن دوس ەكەن دەپ ويلاپ قالماڭىزدار. ونەردەگى قىز- كەلىنشەكتەردىڭ ىشىندە دە روزانىڭ دوستارى كوپشىلىك. اسىرەسە اتى التى الاشقا ءمالىم اقىن اقمارال لەۋبايەۆانىڭ دوستىعى تالايعا ۇلگى. ولار ءبىر- بىرىمەن كەلتە حات ارقىلى ولەڭ جازىسىپ سىرلاساتىن جان دوستار.

 كاسىبي ءانشى رەتىندە ءبىرشاما بەلەستەردى باعىندىرعان، ايەل رەتىندە ومىرگە 4 بىردەي ايداي سۇلۋ ارۋ قىزداردى دۇنيەگە اكەلگەن التىناي جورابايەۆانىڭ دوسى كىم دەسەڭىز ايتايىق. ول ومىردە دە، ونەردە دە جۇپتارى جاراسقان جازيرا مەن جانبولاتتى جان دوس تۇتادى. ولار وتباسىمەن ارالادى. ايتپاقشى التىناي جورابايەۆا ايگۇل يمانبايەۆامەن دە جاقسى ارالسادى. ولاردىڭ اراسىندا قىزعانىش جوق، ازداعان باسەكەلەستىك بولماسا...

 ەلىمىزدەگى شوۋ- بيزنەستىڭ كوش باسىندا تۇرعان بىلىكتى پروديۋسەر بايان ەسەنتايەۆانىڭ تىك مىنەزىنە قاراپ دوسى جوق ادامداي كورىنەدى. الايدا باياننىڭ دوسى بار ەكەن. ول بەلگىلى تەلەجۇرگىزۋشى مادينا بالعابايەۆا. ولار ءبىر- بىرىمەن ستۋدەنتتىك كەزدەن دوس ەكەن. بايان ءتىپتى ءمادينا تۇرمىسقا شىققاندا قىزجولداس تا بولىپتى.

 روزا رىمبايەۆا مەن تولقىن زابيروۆانىڭ دوستىعى ەرەكشە. تولقىن ءبىر جاعىنان روزا قۋانىش قىزىنىڭ شاكىرتى، ەكىنشىدەن سىرلاس دوسى. ولار دا بالا- شاعالارىمەن، وتباسىمەن ارالاسادى.

 ءمادينا ءسادۋاقاسوۆا مەن قاراقات ءابىلدينا سىندى قازاقتىڭ سۇلۋ كەلىنشەكتەرى، ادەمى انشىلەردىڭ دوستىعى دا ادەمى. «ال قۇربىم» دەپ بىرگە ءان شىرقايتىن انشىلەر قاشاندا ءبىر- بىرىنە تىلەۋلەس.

 اقبوتا كەرىمبەكوۆا مەن حاديشا سەيىتوۆانىڭ ءبىر- بىرىنە تابيعاتى جاقىن جان دوستار. ءبىرىنىڭ ۇيىندە ءبىرى ءوز ۇيىندە جۇرگەندەي سەزىنەتىن، ۇنەمى جۇپتارى جازىلمايتىن اقبوتا مەن حاديشانىڭ دوستىعى بىرنەشە جىلدان بەرى جالعاسىپ كەلەدى. سونداي- اق اقبوتا ءوزىنىڭ ونەردەگى قۇربىلارىنىڭ ىشىندە ەرەكشە جاقىن تارتانىن ءانشى ينديرا راسىلحان.

 ماقپال يسابەكوۆا مەن ديلناز احماديەۆانىڭ تۇرلەرى دە، اندەرى دە، ستيلددەرى دە ءبىر- بىرىنە ۇقسايدى. ولاردىڭ تەك ۇقساستىعى تەك سىرت بەينەلەرىندە عانا ەمەس، ىشكى جان- دۇنيەلەرى دە ءبىر- بىرىنە جاقىن. ولار دوس، سىرلاس. ماقپال مەن ديلناز بىرىگىپ بەينەكليپ تە تۇسىرگەن بولاتىن. ولار العاش رەت ەريك تاستانبەكوۆتىڭ ستۋدياسىندا تانىستى، ودان كەيىن بىرگە يۋرمالاعا باردى. ءبىرىن- ءبىرى جاقىن بىلىسكەننەن كەيىن تانىستىقتارى دوستىققا ۇلاستى. قازىرگى تاڭدا ديلناز ماقپالدى ءوزىنىڭ كىشى سىڭىلىسىندەي كورەتىنىن ايتادى.

  اۆتور: اينۇر نۇرسابەت

«الاش ايناسى»