ونەرتاپقىش قانداسىمىز ءانشى مەيرامبەك بەسبايەۆتىڭ ۇلىنا ەلەكتروندى بەسىك سىيلادى - كەسكىن
ءانشى بۇل تۋرالى Instagram جەلىسىندەگى پاراقشاسىندا جاريا ەتتى. ايتا كەتەيىك، «مۋزارت» توبىنىڭ مۇشەسى مەيرامبەك بەسبايەۆ وسى جىلدىڭ 26- ناۋرىزىندا ۇلدى بولعان ەدى.
جەلىگە سالعان ۆيدەوسىنىڭ سيپاتتاماسىندا ءانشى «سەرىكبول باۋىرىمنىڭ ءابۋحايىرعا سىيلىعى. اللا رازى بولسىن»، - دەپ جازدى. شاعىن ۆيدەو روليكتەگى ەلەكتروندى بەسىكتەن مەيرامبەك بەسبايەۆتىڭ ورىنداۋىنداعى «بەسىك جىرى» ايتىلاتىنىن ەستۋگە بولادى.
ەسكە سالايىق، وتكەن جىلدىڭ قاراشا ايىندا قازاقستاندا ءسابيدى بولەپ قانا قويماي، وعان ءالدي ءانىن ايتىپ تا بەرەتىن ەلەكتروندى بەسىكتىڭ ساۋداعا شىعارىلعانى حابارلانعان بولاتىن. يننوۆاتسيالىق بەسىك جونىندە ونەرتاپقىش سەرىكبول شايماردان ايتىپ بەرگەن بولاتىن. ونىڭ ايتۋىنشا، قۇرىلعى باتارەيالارمەن نەمەسە ەلەكتر توگىمەن جۇمىس ىستەيدى. بەسىكتى پۋلتتىڭ كومەگىمەن باسقارۋعا بولادى.
ول ءسابيدىڭ جىلاعان داۋىسىن «بىردەن سەزەدى» دە، تەربەلە باستايدى - اتا-انا بەس رەجيمنىڭ ىشىنەن تەربەلۋ جيىلىگىن ءوزى تاڭداي الادى. قازاقستاندىقتىڭ ونەرتابىسى USB- پورتپەن جابدىقتالعان، اتا-انا وعان ءوز تالعامى بويىنشا اۋەندەردى ەنگىزە الادى. قۇرىلعىنىڭ جادىنا قازاقتىڭ حالىق كۇيلەرى مەن جامبىل جابايەۆتىڭ شىعارمالارى و باستان ەنگىزىلىپ قويعان.
