قازاقستاننىڭ كەن-مەتاللۋرگيا كەشەنىنىڭ ءونىمى يران مەن اراب ەلدەرىنە باعىتتالادى

استانا. قازاقپارات - باستى ماقسات - مەتالل ونىمدەرىن وتكىزۋدىڭ جاڭا نارىقتارىنا قول جەتكىزۋگە نەگىزدەلىپ وتىر.

بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە «تاۋ-كەن ءوندىرۋشى جانە كەن-مەتاللۋرگيا كاسىپورىندارىنىڭ رەسپۋبليكالىق قاۋىمداستىعى» زاڭدى تۇلعالار بىرلەستىگىنىڭ اتقارۋشى ديرەكتورى، ق ر ۇلتتىق كاسىپكەرلەر پالاتاسى كەن-مەتاللۋرگيا كەشەنى كوميتەتىنىڭ ءتوراعاسى نيكولاي رادوستوۆەتس ءمالىم ەتتى.

ونىڭ پايىمىنشا، قازاقستاننىڭ تاۋ-كەن جانە مەتاللۋرگيالىق كەشەنىندە ءونىم ەكسپورتىنىڭ گەوگرافياسى وزگەرىسكە ۇشىراۋى مۇمكىن.

«ءبىز ءۇشىن وتە پەرسپەكتيۆالى باعىت - ول يران. وسى ورايدا يران ءبىز ءۇشىن اشىق مەملەكەت بولادى دەپ ۇمىتتەنەمىز. بۇل تۇرعىدا سانكتسيالىق كەدەرگىلەر دە كۇشىن جويادى دەپ كۇتەمىز. مۇنىمەن قوسا، اراب ەلدەرىنە جانە باسقا دا ەلدەرگە ءونىم وتكىزۋگە نيەتتىمىز»، - دەدى ن. رادوستوۆەتس.

بيىلدىڭ باسىندا ۇكىمەت كەن-مەتاللۋرگيالىق كەشەنىن قولداۋ بويىنشا تەڭدەسسىز قادامداردى قابىلداعانىن ايتا كەلە، بۇل باعىتتا تەمىر جول كولىگىمەن جۇكتەردى تاسىمالداۋعا جەڭىلدىكتەر ۇسىنۋ قامتىلعانىن اتاپ ءوتتى.

ونىڭ سوزىنە قاراعاندا، بىرنەشە جىل بويى مۇنداي جەڭىلدىكتەر ەشكىمگە دە ۇسىنىلمادى. «كولىكتىك شىعىستار جوعارى بولعاندىقتان كوپتەگەن ەكسپورتشىلار جاڭا نارىقتارعا شىعا المادى. ەندى، ۇسىنىلعان جەڭىلدىكتەرگە وراي، ەكىنشى جارتىجىلدىقتا ءبىزدىڭ ءونىمدى جەتكىزۋ بويىنشا وزگەرىسكە ۇشىراعان جاڭا باعىتتاردى بايقايتىن بولامىز»، - دەدى ن. رادوستوۆەتس.

اۆتور: رۋسلان عابباسوۆ