كۇنىنە ءبىر ساعاتتان ارتىق قۇلاققاپپەن ءان تىڭداعان ادام ساڭىراۋ بولادى - عالىمدار
دۇنيە جۇزىلىك دەنساۋلىق ساقتاۋ ۇيىمىنىڭ مالىمەتىنە سۇيەنسەك، الەمدە 1,1 ميلليارد جاس ازامات ۋاقىتىنىڭ كوپ بولىگىن قۇلاققاپپەن ءان تىڭداپ وتكىزەدى ەكەن. سول سەبەپتەن، جەر بەتىندەگى 12-35 جاس ارالىعىنداعى ادامداردىڭ باسىم بولىگىنىڭ ەستۋ قابىلەتىندە اقاۋ بار.
قازىردىڭ وزىندە وسى جاس ارالىعىنداعى 43 ميلليون ادام ساڭىراۋ دەيدى ماماندار. ولاردىڭ 40 پايىزى تۇنگى كلۋبتاردا ۋاقىتىن وتكىزىپ، قۇلاققاپتى سەرىك ەتكەندەر. ال، امەريكالىق جاسوسپىرىمدەر اراسىندا كەرەڭدىككە شالدىققاندار سانى سوڭعى جىلى 5,3 پايىزعا ارتقان.
د س ۇ جۇقپالى ەمەس اۋرۋلار باسقارماسىنىڭ ديرەكتورى، دوكتور ەتەن كرۋگتىڭ ايتۋىنشا، قۇلاققاپتىڭ زياندى ەكەنىن ادامداردىڭ باسىم كوپشىلىگى بىلەدى. ول كەرەڭدىككە الىپ كەلەتىن بىردەن-ءبىر قۇرال. وسىنى بىلە تۇرا جاستار اراسىندا قۇلاققاپقا دەگەن سۇرانىس اسا جوعارى. جوعارى دىبىستى اۋەن ادامدى ساڭىراۋ قىلىپ قانا قويماي، جۇيكە اۋرۋدارىنا دا الىپ كەلەدى دەيدى ەتەن كرۋگ.
وسى ورايدا، دۇنيە جۇزىلىك دەنساۋلىق ساقتاۋ ۇيىمىنىڭ ماماندارى كوپ ساپارلايتىن، اۋەدە كوپ ۇشاتىن ادامدارعا قۇلاققاپتىڭ ارنايى ءتۇرىن پايدالانۋعا كەڭەس بەرەدى. سونداي-اق، مۋزىكا تىڭداۋ كەزىندە اراسىندا ءۇزىلىس جاساپ، كونسەرت كەزىندە اكۋستيكالىق كولونكالاردان الشاق وتىرۋ كەرەكتىگىن دە ايتادى.
BAQ.kz
