قازاقستاندا ورالماندارعا ازاماتتىق الۋدى جەڭىلدەتۋ ۇسىنىلدى

استانا. قازاقپارات - قازاقستاندا ەتنيكالىق قازاقتارعا ورالمان مارتەبەسىن يەمدەنىپ، قازاقستان ازاماتتىعىن الۋدا ءبىرقاتار جەڭىلدەتىلگەن شارتتاردى قابىلداۋ ۇسىنىلدى.

بۇل تۋرالى دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ەڭبەك، الەۋمەتتىك قورعاۋ جانە كوشى-قون كوميتەتىنىڭ ءتوراعاسى اقمادي سارباسوۆ مالىمدەدى.

«قازىرگى تاڭدا ەتنيكالىق قازاقتاردىڭ تاريحي وتانىنا ورالۋىن جەتىلدىرۋ، ولاردىڭ قابىلداۋشى قوعام جاعدايىنداعى بەيىمدەلۋ جانە ينتەگراتسيالاۋ جايىن جاقسارتۋ ماقساتىندا «قازاقستان رەسپۋبليكاسىنىڭ كوشى-قون جانە جۇمىسپەن قامتۋ جونىندەگى كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسى جاساپ شىعارىلدى»، - دەپ حابارلادى سارباسوۆ.

«زاڭ جوباسى ەتنيكالىق قازاقتارعا ورالمان مارتەبەسىن يەمدەنۋدە (ورنالاسۋ وڭىرىنە قاراماستان، ورالمان مارتەبەسىن باستاپقى يەمدەنۋ)، قازاقستان رەسپۋبليكاسىنىڭ ازاماتتىعىن جەڭىلدەتىلگەن تارتىپپەن الۋدا (ورالمان مارتەبەسىن العاننان كەيىن ءبىر جىل ىشىندە) ءبىرقاتار جەڭىلدەتىلگەن شارالاردى، سونداي-اق ۇكىمەتتىڭ انىقتاعان وڭىرلەرىنە ورنالاسقان جاعدايدا، الەۋمەتتىك قورجىن ۇسىنۋدى (كولىك شىعىندارىن وتەۋ، قىزمەتتىك تۇرعىن-جاي نەمەسە جاتاقحانادان بولمە ۇسىنۋ) قاراستىرادى»، - دەپ ناقتىلادى ول.

مينيسترلىك وكىلىنىڭ اقپارىنشا، قازاقستان ازاماتتىعىن جەڭىلدەتىلگەن (تىركەۋ) تارتىپپەن قازاقستان اۋماعىندا زاڭدى نەگىزدە 4 جىلدان كەم ەمەس ۋاقىت تۇراقتى تۇراتىن نەمەسە قازاقستان ازاماتىمەن 3 جىلدان كەم ەمەس مەرزىم نەكەدە تۇرعان ورالماندار الادى.

سونىمەن قاتار ازاماتتىقتى جەڭىلدەتىلگەن (تىركەۋ) تارتىپتە يەمدەنۋ تۋرالى ماتەريالداردى قاراۋ مەرزىمى ارىزدىڭ تاپسىرىلعان كۇنىنەن باستاپ 3 ايدان اسپاۋى ءتيىس.

«كازتاگ»