تاياۋ شىعىس ەلدەرى تۇيەلەر جارىسىن ۇلتتىق سپورتقا اينالدىرعان

استانا. قازاقپارات - بىرىككەن اراب امىرلىكتەرىندە تۇيەلەر جارىسىنىڭ فينالدىق سىنى باستالدى. كونەدەن كەلە جاتقان قىزىقتى دا، كۇردەلى دودانى تاماشالاۋعا جىل سايىن مىڭداعان ادام دۋبايعا كەلەدى.

 تۇيەلەردىڭ جارىسى دەگەن تىركەس ءبىزدىڭ قۇلاعىمىزعا ەرسىلەۋ ەستىلەدى. ويتكەنى ءومىر بويى جىلقى جارىستىرىپ كەلگەن قازاق حالقى ويسىلقارا تۇلىكتەرى سىنعا تۇسە الادى دەپ ەشقاشان ويلاماعان.

 ال تاياۋ شىعىس ەلدەرى ونى اۋەلدە- اق ۇلتتىق سپورتقا اينالدىرىپتى. اسىرەسە ارابتار تۇيە بايگەگە ءتۇستى دەسە، ىشكەن استارىن جەرگە قويادى ەكەن.

 جارىس جولىنىڭ جالپى ۇزىندىعى -  5 شاقىرىمدى قۇرايدى. شۋدالارىن شاڭ باسقان جانۋارلار ونى 5 مينۋتقا جەتكىزبەي وتە شىقتى. ەڭ قىزىعى، سايىسقا تۇسكەن 30 تۇيەنىڭ جانىندا 60 كولىك ءجۇرىپ وتىرادى ەكەن. بۇلاردىڭ ىشىندە قوجايىندارى بار. ال شاباندوز ورنىنا امورتيزاتور مەن GPS قۇرىلعىلار ورناتىلعان. يەلەرى ونى پۋلتكە قوسىپ، سول ارقىلى باسقارىپ وتىرادى ەكەن.

 الامانعا تۇسەتىن تۇيەلەردى ارنايى ورتالىقتا ىرىكتەپ الادى. ەڭ جۇيرىك دەگەن نارلار عانا جارىسقا قاتىسادى. ال ماڭ- ماڭ باسقان قوس وركەشتىلەر وعان جارامايدى.

  قىزىقتى دا، كۇردەلى دودانىڭ جۇلدەسى دە قوماقتى. جەڭىسكە جەتكەن جانۋارلار يەسىنە كولىك، التىن، ءتىپتى 1 ميلليون ا ق ش دوللارى تابىستالادى.