ماس ەتىكشى - قۇدايى كورشى

استانا. قازاقپارات - كۋفا قالاسىندا جاس ەتىكشى يمام اعزام ءابۋ حانيفامەن كورشىلەس تۇردى. كۇن سايىن كەش باتقاندا ەڭبەگىنەن تۇسكەن اقشاعا سىرا ساتىپ الاتىن.

ماس بولعان ساتىندە كۇندەلىكتى ءبىر ولەڭىن قايتالاپ ايتا بەرەتىن: «كەرەك كەزىمدە قۇشاقتاسىپ جۇرگەن، ەندى مەن مۇقتاج بولعان كەزىمدە، قايدا كەتتى سول ءبىر دوستارىم؟». ءتۇنى بويى ۇيىقتاماي، قۇلشىلىق ەتىپ جۇرگەن ءابۋ حانيفا وسى سوزدەردى ەستيدى.

ءبىر كۇنى ءان ايتىلماي تىم-تىرىس بولىپ قالدى. سوندا ءابۋ حانيفا ىشتەي بۇل قايدا كەتتى دەپ ويلايدى. سويتسە، ءتارتىپ ساقشىسى جاڭاعى ەتىكشىنى تۇتقىنعا العان ەكەن.

ءابۋ حانيفا كەلەسى كۇنى تاڭ نامازىن وقىپ بولىپ، قاشىرىنا ءمىنىپ، باسشىعا قاراي بەت الادى. پاتشا ءابۋ حانيفانىڭ كەلگەنىن كورىپ ءوز نوكەرلەرىنە: «قاشىرىنان تۇسپەي جاتىپ وعان كومەك بەرىڭدەر! ەگەر ول تۇسكىسى كەلسە ونىڭ اياعىنىڭ استىنا كىلەم توسەمەيىنشە تۇسىرمەڭدەر!» - دەپ ءامىر ەتەدى.

تيەسىلى قۇرمەت كورسەتىلگەننەن كەيىن پاتشا ءابۋ حانيفادان: «سەنى سارايعا الىپ كەلگەن نە نارسە؟» - دەپ سۇرادى. ءابۋ حانيفا: «كورشىم جايىندا سۇراعالى كەلدىم»، - دەيدى. پاتشا ءابۋ حانيفانىڭ قۇرمەتىنە اباقتىدا جاتقان كورشىسىن جانە سول ءتۇنى سوتتالعانداردىڭ بارلىعىن اباقتىدان بوساتادى.

ءابۋ حانيفا قاشىرىنا وتىرىپ ەتىكشى كورشىسىمەن بىرگە ۇيگە قاراي بەت الادى. ۇيىنە جەتكەندە ەتىكشىدەن: «سەن مۇقتاج بولعانىڭدا ءبىز سەنى تاستادىق پا؟» - دەپ سۇرايدى. سوندا جاڭاعى ەتىكشى جاس جىگىت: «اللانىڭ اتىمەن انت ەتەيىن، سەن مەنى تاستاعان جوقسىڭ، سەن كورشىلىك مىندەتىڭدى اتقاردىڭ، سەنى دە اللا ساقتاسىن»، - دەپ ۇلكەن ريزاشىلىعىن بىلدىرەدى.

سودان بەرى الگى كورشىسى تاۋبەسىنە كەلىپ، اراعىن قويىپ، يمام اعزامنىڭ شاكىرتى بولدى.

ummet.kz