ا. ماتروسوۆتىڭ ەرلىگىن قايتالاعان سۇندەتقالي ەسقاليەۆ
كەڭەس وداعىنىڭ باتىرى سۇندەتقالي ەسقاليەۆ 1924 -جىلى باتىس قازاقستان وبلىسى شىڭعىرلاۋ اۋدانىنىڭ الماز اۋىلدىق وكرۋگىنە قاراستى اققۇدىق (كونستانتينوۆكا) ەلدى مەكەنىندە دۇنيەگە كەلگەن.
ول 1942 -جىلعى شىلدە ايىندا اسكەرگە الىنعان.
1944 -جىلى 556-اتقىشتار پولكىنىڭ قۇرامىندا بەلورس رەسبۋليكاسى موگيلەۆ وبلىسى بىحوۆ اۋدانى لۋدچيتسى دەريەۆنياسىن ازات ەتۋدە ماڭگى وشپەس ەرلىك كورسەتىپ، تاريحتا باتىر بولىپ قالدى.
بۇل ماۋسىم ايىنىڭ 23 نەن 24 نە قاراعان ءتۇن ەدى. 556- اتقىشتار پولكىنىڭ روتاسى دەرەۆنيا ماڭىندا ۇرىسپەن جاۋدىڭ قورعانىس شەبىن بۇزىپ ءوتىپ، العا ۇمتىلعان ەدى.
شاعىن دەرەۆنيانى قالايدا بەرمەۋگە جانتالاسقان نەمىستەر شابۋىلدى ءالسىن-ءالسىن تويتارىپ، زاۋلاتقان زەڭبىرەگىمەن، قارشا بوراتقان وعىمەن تالاي ساربازدىڭ ءومىرىن قيدى. اسىرەسە، لۋدچيتسىنىڭ شىعىس جاعىنداعى ءدوڭ ۇستىندە دزوتقا ورنالاسقان «اۋزى جابىلماعان» جاۋ پۋلەمەتى جاۋىنگەرلەردىڭ باسىن كوتەرتپەدى.
وسى جاۋ نۇكتەسىنىڭ ءۇنى وشكەندە عانا شەشۋشى ءسات ءوز جاقتارىندا بولاتىنىن ءبارى دە ءتۇسىندى. سارباز سۇندەتقالي قارۋلاستارى كۇتپەگەن شەشىمگە كەلدى. جەر باۋىرلاپ بارىپ، پۋلەمەتكە گراناتا لاقتىرىپ ەدى، ءبىراق ول جارىلماي قالدى. بۇنى كورگەن جاۋىنگەر ۇشىپ تۇرىپ، امبرازۋرانى ءوز كەۋدەسىمەن جابا قۇلادى.
قاقالىپ- شاشالعان پۋلەمەتتىڭ ءۇنى سوندا عانا ءوشتى. وسىلايشا جانقيارلىق ەرلىگىمەن س. ەسقالييەۆ ءوز جولداستارىنا جول اشقان ەدى. ا. ماتروسوۆتىڭ ەرلىگىن قايتالاپ، نەبارى جيىرما جاسىندا قىرشىن كەتكەن قازاق جىگىتىنە 1945 -جىلى 24 - ناۋرىزدا كەڭەس وداعىنىڭ باتىرى اتاعى بەرىلدى.
اۋىلداستارىنىڭ سوزىنە قاراعاندا، سۇندەتقالي جەتىم وسكەن. ونى راحيما يماشيەۆا ەسىمدى ابزال انا اسىراپ الىپ، ەرجەتكىزەدى. كەيىن 1967 -جىلى ر. يماشيەۆا اۋىل دەلەگاتسياسى قۇرامىندا باتىر جەرلەنگەن جەرگە بارىپ، تاعزىم ەتىپ قايتقان.
1966 -جىلى ول وقىعان مەكتەپكە ەردىڭ ەسىمى بەرىلىپ، ءمۇسىنى قويىلدى. سونداي-اق مينسك، بىحوۆ جانە ورال قالالارىنىڭ ءبىر- ءبىر كوشەسى س. ەسقاليەۆتىڭ ەسىمىمەن اتالادى. «ەردىڭ اتىن ەل ساقتار» دەگەن وسى بولسا كەرەك.
