وتاندىق فيلمدەر كورشى ەلدەردە سۇرانىسقا يە ەمەس - رەجيسسەر

استانا. قازاقپارات - كينو - قىمبات ويىنشىق. سالا ماماندارى سونى ءتۇسىنۋى ءتيىس. بۇل تۋرالى «الماتى» تەلەارناسى «ىسكەرلەر ۋاقىتى» باعدارلاماسىندا تانىمال كينورەجيسسەر ەرمەك تۇرسىنوۆ مالىمدەدى.

 ونىڭ ويىنشا، شىعىنى كوپ جوبا ايتارلىقتاي پايدا اكەلمەۋى مۇمكىن.

«ماسەلەن، قازاقستاندا 1 ميلليون دوللارعا تۋىندى ءتۇسىرۋ ءوزىن- ءوزى اقتاي قويمايدى. ويتكەنى بىزدە مۇنداي جوبا كوپ تابىس اكەلەتىن كينوتەاترلار مەن كورەرمەندەر از»، - دەپ ءتۇسىندىردى رەجيسسەر.

ونىڭ سوزىنشە، امەريكا مەن ەۋروپادا كينو اقشادان باستالادى دەگەن اڭگىمە قوزعاۋ اعاتتىق.

«ول جاقتا اقشا كوپ، ءبىراق يدەيا از جانە ول ولارعا قاجەت. كەلتىرەتىن مىسال كوپ. ماسەلەن، تاڭىرقاتا قويمايتىن زاتتار قاعاز جۇزىندە تيىن- تەبەن تۇرۋى مۇمكىن، ءبىراق ءىس جۇزىندە كەرەمەت يدەياعا اينالۋى عاجاپ ەمەس. «اقشاڭدى بەر، كينو تۇسىرەمىن» دەگەن تۇسىنىك دۇرىس ەمەس. بىزدە ءتىپتى، 300 مىڭ دوللارعا جاقسى دۇنيە شىعارۋعا بولادى»، - دەدى ەرمەك تۇرسىنوۆ.

ونىڭ ايتۋىنشا، وتاندىق فيلمدەر كورشى ەلدەردە سۇرانىسقا يە ەمەس. سەبەبى ولاردىڭ اسا ءىرى «كارو فيلم» ، «ۆيدەو ينتەرنەشنل» سىندى ورتاسى بار.

«ولاردىڭ ءوز نارىعى بار. وزگەنىڭ تۋىندىلارىن ءوز «باقشالارىنا» جولاتپايدى»، - دەدى رەجيسسەر.

تۇرسىنوۆتىڭ ايتۋىنشا، رەسەيلىك ساتىپ الۋشىلار امەريكا جانە ەۋروپا ەلدەرى شىعارعان فيلمدەرگە باسا نازار اۋدارادى. ال قازاقستان، قىرعىزستان، وزبەكستان ەلدەرى شىعارعان تۋىندىلار رەسەيدى قىزىقتىرا قويمايدى.