قورعانىس مينيسترلىگىنىڭ «ماڭگى ەسىمىزدە» جۋرناليستەر بايقاۋى اياقتالۋعا جاقىن

استانا. قازاقپارات - قازاقستاننىڭ بۇقارالىق اقپارات قۇرالدارى اراسىندا قازاق جانە ورىس تىلدەرىندە ۇلى وتان سوعىسى تاقىرىبىنداعى ۇزدىك جۋرناليستىك ماتەريالدى انىقتايتىن بايقاۋ وتكىزىلمەك، دەپ جازادى mod.gov.kz.

بايقاۋدىڭ نەگىزگى ماقساتى - 1941-1945-جىلدارداعى ۇلى وتان سوعىسىنداعى تاريح، قازاقستاندىق ساربازدار، وفيتسەرلەر مەن تىل ەڭبەككەرلەرىنىڭ جەڭىسكە قوسقان ۇلەسى، داڭقتى ەرلىكتەرى مەن قاھارماندىعى تۋرالى حالىقتى اۋقىمدى اقپاراتتاندىرۋ.

بايقاۋعا گازەت، راديو جانە تەلەارنا جۋرناليستەرى، اقپاراتتىق اگەنتتىكتەر، سونىمەن بىرگە ەكىنشى دۇنيە جۇزىلىك سوعىستىڭ تاريحى، مايدانگەرلەردىڭ سوعىستان كەيىنگى تاعدىرى، تىل ەڭبەككەرلەرى، ۇ و س ارداگەرلەرىنىڭ قوعامدىق ۇيىمدارى تۋرالى جانە مايدان دالاسىندا قازا تاپقانداردى ىزدەستىرۋ تۋرالى ماتەريالداردى جاريالاپ جۇرگەن شتاتتان تىس اۆتورلار قاتىسا الادى.

2015-جىلعى 1- قاڭتار مەن 20- مامىر ارالىعىندا بايقاۋعا مەملەكەتتىك جانە ورىس تىلدەرىندەگى ماتەريالدار قابىلدانادى.

جەڭىمپازدار «باسپا ءسوز باسىلىمىنداعى ۇزدىك جاريالانىم»، «عالامتور باسىلىمداعى ۇزدىك جاريالانىم»، «ۇزدىك تەلەسيۋجەت/تەلەباعدارلاما»، «ۇزدىك راديوسيۋجەت/راديوباعدارلاما»، «ۇزدىك فوتورەپورتاج/فوتووچەرك» اتتى بەس نوميناتسيا بويىنشا انىقتالادى. ءار اتالىم بويىنشا ءبىر جەڭىمپاز انىقتالادى.