قىتايلىقتار اقتاۋدا ءوز اقشالارىنا مۇناي وڭدەۋ زاۋىتىن سالۋعا نيەتتى
بۇل تۋرالى Forbes.kz-كە سىلتەمە جاساپ NUR. KZ حابارلايدى.
جاقىندا ماڭعىستاۋ وبلىسىندا العاشقى قازاقستان بيتۋمدىق زاۋىتىن سالعان قىتايلىق CITIC كومپانياسى، بارلىق شىعىندى وزدەرى كوتەرىپ، سول وڭىرگە مۇناي وڭدەۋ زاۋىتىن دا سالۋعا نيەتتى ەكەندىگىن ءبىلدىردى.
بۇل اقپارات جاناما تۇردە رەسمي ساپاردىڭ باسپا ءسوز حابارلاماسىندا راستالىپ، وندا قول قويىلعان كەلىسىم-شارت بىرنەشە سالادا ىنتىماقتاستىقتى دامىتۋ ماسەلەلەرىن قاراستىراتىندىعى جازىلعان. اتاپ ايتقاندا، بولات قۇيۋ ءوندىرىسى، ءتۇرلى-ءتۇستى مەتاللۋرگيا، تاباق اينەكتەر شىعارۋ، گيدرو ەنەرگەتيكا جانە مۇناي ايىرۋ سالالارى.
جانار-جاعارماي ونىمدەرىنىڭ تاپشىلىعىنا قاراماستان، ەلىمىزدەگى بيلىك وتكەن جىلى مۇناي وڭدەۋ زاۋىتى سالىنبايدى دەپ شەشىپ، تەك شىمكەنتتىك زاۋىت ۇلعايتىلاتىندىعىن ايتقان ەدى. بۇل شەشىمدى ولار جاڭا مۇناي وڭدەۋ زاۋىتى تىم كوپ قاراجاتتى قاجەت ەتەتىندىگىمەن تۇسىندىرگەن بولاتىن.
قىتايلىق جوبا شىعىنى از بولماق. جوبانى قىتايلىق ەكسيمبانك قارجىلاندىرۋعا دايىن.
ماڭعىستاۋ وبلىسى اكىمىنىڭ ورىنباسارى راقىمبەك ءامىرجانوۆتىڭ ايتۋىنشا، جوبا العاش رەت وسى جىلدىڭ قاڭتارىندا III قازاق-قىتاي فورۋمىندا ۇسىنىلدى. جاڭا زاۋىت جىلىنا 6 ميلليون تونناعا دەيىن مۇناي وڭدەۋگە جارايدى. قۇرىلىسى 5 جىلعا سوزىلاتىن جوباعا $5-6 ميلليارد قارجى جۇمسالادى دەپ كۇتىلۋدە.
«قازىرگى ۋاقىتتا ەلىمىزدەگى ءبىر جىلدا تۇتىناتىن 6 ميلليون توننا مۇناي ونىمدەرىنىڭ %30 (1,8 ميلليون توننا) قازاقستانعا شەتەلدەن اكەلىنەدى. بۇل ماسەلەنىڭ تۋىنداۋىنا كەڭەس كەزەڭىنەن قالىپتاسقان قازاقستاندىق مۇناي وڭدەۋ زاۋىتتارىن رەسەيدىڭ باتىس سىبىرلىك كەن ورىندارىنىڭ جەتكىزىلىمدەرىمەن بايلانستىرۋ جاعدايى سەبەپكەر بولدى. 90- جىلداردىڭ باسىندا وتاندىق مۇناي وڭدەۋ زاۋىتتارى (%80 پايىزى رەسەيلىك بولىپ تابىلاتىن) 17 ميلليون تونناعا جۋىق مۇنايدى وڭدەسە، سوڭعى جىلدارى بۇل كولەم ءۇش ەسەگە دەيىن قىسقاردى»، - دەيدى راقىمبەك ءامىرجانوۆ.
ەسكە سالا كەتسەك، ناۋرىز ايىندا ەلىمىزدىڭ ەنەرگەتيكا ۆيتسە-ءمينيسترى ماعزۇم مىرزاعاليەۆ «مۇنايدى 10 ميلليون توننادان كەم وڭدەيتىن زاۋىت سالۋ پايدا اكەلمەيدى» دەگەن بولاتىن.
