مالايزيالىق پرەمەردىڭ قىزىن العان قازاق جىگىتى وتاندىق ب ا ق- قا سۇحبات بەردى
بۇل تۋرالى esquire.kz-كە سىلتەمە جاساپ NUR. KZ حابارلايدى.
كوشىلىكتىڭ «نەگە قازاق قىزىن المادى؟» دەگەن رەنىشىنە كەسىكبايەۆ عاشىق جۇرەككە ءامىر جوقتىعىن ايتتى.
«قاي ۇلت وكىلى ەكەندىگى ماڭىزدى ەمەس، ەگەر ومىرلىك سەرىگىڭدى جولىقتىرساڭ، ونىمەن ماڭگى بىرگە بولعىڭ كەلەدى. كەڭەس وكىمەتى قۇلاعاننان بەرى جۇرتشىلىق شەكارا اسىپ، بىلىمدەرىن شىڭداۋدا. شەتەلدەن قوساعىن تابۋ - تاڭسىق دۇنيە ەمەس. كەزىندە بوتەن اۋىلدان قىز العانعا دا شۋلايتىن حالىق قازىردە شەكسىز ماحابباتتىڭ شەكارا تانىمايتىنىنا كوز جەتكىزدى» - دەيدى توي يەسى.
ال الەۋمەتتىك جەلىدە كوپشىلىكتىڭ «توي نەگە قازاقستاندا ەمەس مالايزيادا ءوتىپ جاتىر؟» دەپ تاڭدانۋىنىڭ سەبەبىن كەسىكبايەۆ تۇسىنبەيتىندىگىن ايتتى.
«ءبىرتۇرلى سۇراق ەكەن. ءبىزدىڭ ءداستۇر بويىنشا الدىمەن قىزدى ۇزاتىپ الىپ كەلىپ، سودان كەيىن ءوز جەرىندە توي جاساماي ما؟ العاشقى توي كەلىننىڭ جەرىندە بولۋى كەرەك. بۇل قازاقتارعا دا، مالايزيالىقتارعا دا بىردەي شارت. تەك، ايىرماشىلىعى - مالايزيالىقتار ءداستۇر بويىنشا قىزعا ءبىر توي ەمەس، بىرنەشە توي جاسايدى. سوڭعىسى 4- ساۋىردە نۋريانانىڭ اكەسى تۋعان جەردە، پەحانگتە بولادى. تويعا نەگىزىنەن ونىڭ پارتياداعى جاقتاستارى جينالادى. ال قازاقستاندا توي كۇنى 18- ساۋىرگە بۇرىننان-اق بەلگىلەنىپ قويعان»، - دەپ ءتۇسىندىردى دانيار.
«مالايزيادا تۇرعىندار ساياساتكەرلەردىڭ اشىق بولۋىن تالاپ ەتەدى. سول سەبەپتى پرەمەر-مينيستر جاقىندارىمەن قوسا، بارلىق يتەلليگەنتسيانى، شەندى ادامداردى تويعا شاقىرىپ وتىر. بايقاعان شىعارسىزدار؟ تويعا تايلاند پەن يندونەزيا باسشىلارى، سينگاپۋر پرەمەر-ءمينيسترى جانە وزگەلەر شاقىرىلدى. قوناقجايلىق تانىتىپ، قۋانىشتى بولىسۋگە بارلىقتارىن شاقىرۋ - قوعامعا كورسەتكەن سىي-قۇرمەتتىڭ كورىنىسى. مەن تەك 200 ادامدى شاقىرام دەپ ايتا المايمىن»، - دەپ جالعاستىردى توي يەسى.
كەسىكبايەۆ تويدىڭ قازاقتاردا ءارى كەتسە 500 ادامعا جاسالعانىمەن سالىستىرعاندا مالايزيالىقتار 2000-3000 ادام شاقىراتىنىنا تاڭدانىسىن جاسىرمادى. ول كەز-كەلگەن ەلگە قوناق بولعاندا سول ەلدىڭ ءداستۇرىن سىيلاۋدى ادەتكە اينالدىرعان ەكەن. كۇيەۋ جىگىت مالايزيالىقتار مۇسىلمان حالىق بولعان سوڭ، قازاقتارعا ۇقساس، جاقىن كەلەتىندىگىن بايقاعان.
اڭگىمە بارىسىندا كەسىكبايەۆ ءوز ەلىنىڭ ازاماتى ەكەندىگىن ماقتان تۇتاتىندىعىن ايتىپ، ازاماتتىق جايلى سىبىستى جوققا شىعاردى.
«مەندە مالايزيالىق پاسپورت جوق، مۇنى جاريالاعان ب ا ق قاتەلەسكەن بولۋى كەرەك. مەن ءوز ەلىمنىڭ ۇلىمىن. جانە سونىمەن ماقتانامىن!»، - دەدى كەسىكبايەۆ.
كەرەمەت قىزدى الىپتى دەپ شۋلاسقان جۇرتشىلىقتىڭ پىكىرىمەن كۇيەۋ جىگىت تولىقتاي كەلىسەدى ەكەن.
«مەن ولارمەن كەلىسەمىن، مەنىڭ ايەلىم وتە اقىلدى، جانى جايساڭ، جۇرەگى كەڭ جان. ءبىز ءبىر-بىرىمىزگە جاقسى جاراسامىز!» - دەپ اعىنان جارىلدى دانيار.
ال جۋرناليستىڭ «ءسىزدىڭ اناڭىز وتە جىگەر مىنەزدى جان، اناڭىز سىزگە قانشالىقتى اسەرىن تيگىزۋدە؟» دەگەن ساۋالىنا دانيار «ءار بالاعا تىكەلەي اسەر ەتىپ، اياعىنان تۇرۋعا كومەكتەسەتىن بىردەن-ءبىر جان - انا، مەن انامدى ماقتان تۇتامىن» دەگەن جاۋاپ قايتاردى.
ايتا كەتەرلىگى، دانيار كەسىكبايەۆتىڭ سوزىنە سەنسەك، تويدا تەك كىشى باۋىرى حانبولات نازاربايەۆ بولعانىنا قاراماستان، قوناققا بارلىق تۋىستارى شاقىرىلعان ەكەن. الايدا، توي جەرى الىس بولعاندىقتان كوبى كەلە الماعان.
ال 18- ناۋرىزدا ەلىمىزدە وتەتىن تويعا بارلىق جاقىندارى شاقىرىلىپتى. سۇحبات بەرۋشى سونداي-اق قازاقستان پرەزيدەنتىنىڭ وتباسىمەن ءتۇرلى سىبىستارعا قاراماستان جاقسى قارىم-قاتىناستا ەكەنىن باسا ايتتى.
توي پرەزيدەنتتىك سايلاۋ ۋاقىتىنا جاقىن بولعانىمەن، كەسىكبايەۆ سايلاۋعا كەلەتىنىن مالىمدەدى.
ول سۇحبات بارىسىندا ەلباسىنا داۋىس بەرەتىنىن جانە پرەزيدەنتىمىزدىڭ جاقسى ليدەر ەكەندىگىن ايتتى.
ال توي الەگى بىتكەننەن كەيىن، ايەلى Harvard Kennedy School مەن Wharton Business School ۋنيۆەرسيتەتتەرىنىڭ بىرىندە وقۋىن جالعاستىرىپ، قوس عاشىقتار ا ق ش پەن مالايزيا اراسىندا تۇراتىندىعىن ايتتى.
ايتا كەتەيىك، تويدا سپيرتتىك ىشىمدىك بولعان جوق. ۇيلەنۋ تويى مالايزيانىڭ ءداستۇرى بويىنشا ءوتتى - كۇيەۋ بالا مەن قالىڭدىق جانە قوناقتار ۇلتتىق كيىم كيدى. كۇيەۋ بالا - دانيار كەسىكبايەۆتىڭ قۇرمەتىنە - «قارا جورعا» ءبيى بيلەنىپ، وركەستر «جار- جار» ءانىن ايتتى.
ۇيلەنۋ تويىندا 300 ادامنان قۇرالعان پەرسونال قىزمەت ەتتى. نەگىزگى تاعامدار رەتىندە بيرياني كۇرىشى، تاۋىق جانە سيىر ەتىنەن ساتەي، كارري مەن ماسال قوسىلعان كاۋاپقا ۇقسايتىن تاعام، مالايزيانىڭ سيىردان جاسلاعان رەندانگ تاعامى. قوناقتار ءشاي مەن تاريك ءىشتى.
قازاقستاندىق دانيار كەسىكبايەۆ پەن نۋريانا نادجۆا نيۋ- يوركتا نۋريانانىڭ 21 جاسقا تولعان تۋعان كۇنىندە تانىسقان. ەكەۋى دە ا ق ش- تا ءبىلىم الدى: دانيار - كولۋمبيا ۋنيۆەرسيتەتىنىڭ تۇلەگى، ال نۋريانا ۆاشينگتوندا دجوردجتاۋن ۋنيۆەرسيتەتىندە وقىعان.
