نەمىس عالىمدارى نەگە شەتەلگە قونىس اۋدارىپ جاتىر؟

استانا. قازاقپارات - نەمىس عالىمدارى، ينجەنەرلەرى مەن فيزيكتەرى شەتەلدە جۇمىس ىستەۋدى ءجون سانايدى.

عالىمداردىڭ ەلدەن جاپپاي كوشۋى گەرمانياداعى باستى ماسەلەلەردىڭ بىرىنە اينالدى. سەبەبى سوڭعى ون جىلدا جارتى ميلليونعا جۋىق عالىم شەتەلگە قونىس اۋدارعان. ولاردىڭ ەلدە قالۋىنا نە كەدەرگى؟

فورتەپيانو، سكريپكا مەن بايان - فيليپپ گيديونىڭ اينىماس سەرىكتەرى. ول جاستايىنان مۋزىكالىق اسپاپتاردىڭ شىعۋ تاريحى مەن جاسالۋ جولدارىنا قىزىققان. وسىلايشا مەكتەپتى ءتامامداعان سوڭ پوتسدام ۋنيۆەرسيتەتىنە ءتۇسىپ، اكۋستيكالىق فيزيكا جايىندا ءبىلىم الادى. بىرنەشە ايدان سوڭ دوكتور دارەجەسىنە دەيىن كوتەرىلەدى. 31 جاستاعى جاس عالىم گەرمانيادان كەتۋ تۋرالى شەشىم قابىلداپتى.

«مەن فيزيكتەردىڭ حالىقارالىق كونفەرەنتسياسىنا قاتىستىم. سوندا ماعان بىرنەشە ۇسىنىس ءتۇستى. سودان فرانسياعا كوشۋگە كەلىسىمىمدى بەردىم. بىلەسىز بە، وندا بارلىق جاعداي جاسالعان. مەن زەرتتەۋمەن اينالىسامىن. ال فرانسيادا كارەرامنىڭ وسۋىنە مۇمكىندىك زور»، - دەيدى فيزيك-استرونوم فيليپپ گيديو.

ەڭبەك جولىنداعى ءوسۋ، جوعارى جالاقى. ءبىر سوزبەن ايتقاندا باقۋاتتى ءومىر سۇرۋگە كەپىلدىك. بۇل - نەمىس عالىمدارىنا ءوز وتانىندا جاسالماعان جاعداي. ءدال وسى فاكتورلار جاس مامانداردىڭ ەلدەن كەتۋىنە سەپ بولعان. مامانداردىڭ باسىم بولىگى شۆەيتسارياعا بارۋدى ءجون سانايدى. وندا 209 مىڭ عالىم قونىس اۋدارعان.

ال، 136 مىڭ عالىم ا ق ش- قا، تاعى 109 مىڭى اۆسترياعا كوشكەن. يسپانيا مەن فرانسياعا كەتكەندەر سانى 145 مىڭعا جۋىقتايدى. ال نيدەرلاند پەن كانادانىڭ ءار قايسىسىندا 35 مىڭ نەمىس عالىمى جۇمىس ىستەيدى.

«ءبىز ەلدەن كەتكەن 1700 ادامعا ساۋالناما جۇرگىزدىك. ولاردىڭ %70 ءبىرجولاتا قونىس اۋدارعان. كوشۋ سەبەپتەرىن شەتەلدە جوعارى جالاقى تولەنەدى دەپ ءتۇسىندىرىپتى. تەك وتكەن جىلدىڭ وزىندە گەرمانيادان 52 مىڭ مامان شەتەلگە كوشىپ كەتكەن»، - دەپ ءتۇسىندىردى كوشى-قون جانە ينتەگراتسيالىق جۇمىس جونىندەگى ساراپتامالىق وداقتىڭ ديرەكتورى، - كورنەليا شۋ.

نەمىستەر جىلىنا ورتا ەسەپپەن 25 مىڭ جوعارى ساناتتى مامانىن جوعالتادى. ال سوڭعى ون جىلدا جارتى ميلليونعا جۋىعى ەلدەن كوشىپ كەتكەن. بۇل نەمىس ساراپشىلارىن الاڭداتىپ وتىر. ەگەر جاقىن ارادا مۇنداي كوشى-قون پروتسەسى تولاستامايتىن بولسا، گەرمانيا بولاشاقتا شەتەلدىك عالىمداردىڭ كومەگىنە جۇگىنۋىنە تۋرا كەلەدى.

ايتا كەتەيىك، قازىردىڭ وزىندە-اق مۇندا دارىگەرلەر مەن IT ماماندارىنىڭ تاپشىلىعى سەزىلۋدە.

24.kz