قازاقستاننىڭ بايراعى ۆەتنام جەرىندە تۇڭعىش رەت جەلبىرەدى
«لەنتانى كەسۋ راسىمىنەن كەيىن قازاقستان رەسپۋبليكاسىنىڭ ءانۇرانىنىڭ سالتاناتتى اۋەنىمەن وتانىمىزدىڭ كوك بايراعى ەلشىلىكتىڭ ۇستىنەن كوتەرىلدى»، - دەلىنگەن باسپا ءسوز حابارلاماسىندا.
قازاقستان رەسپۋبليكاسى پارلامەنتى ءماجىلىسىنىڭ ءتوراعاسى قابيبوللا جاقىپوۆ ءوز سوزىندە قازاقستاننىڭ ۆەتنامداعى ەلشىلىگىنىڭ اشىلۋى تاراپتاردىڭ ەكى جاقتى قاتىناستاردى نىعايتۋدىڭ جارقىن دالەلى بولىپ تابىلاتىنى جانە بۇل ەلدەرىمىزدىڭ ەرەكشە دوستىق قارىم-قاتىناستارىنىڭ، سەنىمى جانە سەرىكتەستىگىنىڭ بەلگىسى دەپ اتاپ ءوتتى.
سونىمەن قاتار، باسپا ءسوز حابارلاماسىندا ۆەتنام سىرتقى ىستەر ءمينيسترىنىڭ ورىنباسارى بۋي تحان شون ەكى ەل اراسىنداعى ءداستۇرلى دوستىق قاتىناستاردى اتاپ ءوتىپ، حانويدا قازاقستان ەلشىلىگىنىڭ اشىلۋى قازاقستان باسشىلىعىنىڭ ۆەتناممەن ىنتىماقتاستىقتى دامىتۋعا شىن نيەتىنىڭ دالەلىن راستاپ، ەكى جاقتى ىنتىماقتاستىقتى ودان ءارى كەڭەيتۋ مەن تەرەڭدەتۋگە قىزمەت ەتەتىنىن اتاپ ءوتتى.
ايتا كەتەيىك، قازاقستان مەن ۆەتنام اراسىنداعى ديپلوماتيالىق قاتىناستاردىڭ ورناعانىنا 22 جىل بولدى. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قازاقستان رەسپۋبليكاسىنىڭ ۆەتنام سوتسياليستىك رەسپۋبليكاسىنداعى ەلشىلىگىن اشۋ تۋرالى جارلىعى 2013-جىلعى قاراشا ايىندا جاريالانعان، ال ۆەتنامنىڭ استاناداعى ەلشىلىگى 2008-جىلدان بەرى ءوز قىزمەتىن اتقارىپ كەلەدى. قازاقستاننىڭ ۆەتنامداعى ەلشىسى بەكەتجان جۇماحانوۆ سەنىم گراموتالارىن ۆەتنامنىڭ پرەزيدەنتى چىونگ تان شانگقا 2014-جىلعى 6- ناۋرىزدا تابىس ەتكەن بولاتىن.
