ازاماتتى ۇرىپ-سوققان پوليتسيا قىزمەتكەرلەرى سوتتالدى

ورال. قازاقپارات - شىڭعىرلاۋ اۋداندىق سوتى ق ر ق ك 362-بابى 4-بولىگىنىڭ 1-تارماعى بويىنشا ايىپ تاعىلعان اۋداندىق ىشكى ىستەر ءبولىمىنىڭ ۋچاسكەلىك پوليتسيا ينسپەكتورىنىڭ بۇرىنعى كومەكشىسى ج. سۇلتانعاليەۆ پەن تەحنيك-كريميناليست د. پاراداعا قاتىستى ۇكىم شىعاردى.

ب ق و پروكۋراتۋراسىنىڭ باسپا ءسوز قىزمەتىنەن تۇسكەن مالىمەتكە قاراعاندا، جابىرلەنۋشىنىڭ ارىزى نەگىزىندە ۇرىپ-سوعۋ فاكتىسى بويىنشا اۋدان پروكۋراتۋراسى اتالعان قىزمەتكەرلەردىڭ ۇستىنەن قىلمىستىق ءىس قوزعادى. اتاپ ايتقاندا، سۇلتانعاليەۆ پەن پارادا قىزمەتتىك وكىلەتتىلىكتەرىن اسىرا پايدالانىپ، اكىمشىلىك ايىپپۇلدى تولەمەگەنى ءۇشىن اتالعان تۇرعىندى سوققىعا جىققان. ءسويتىپ تومەنگى جاق سۇيەگىن سىندىرىپ، دەنساۋلىعىنا ورتاشا دارەجەدە زاقىم كەلتىرگەن.

الدىن الا تەرگەۋ بارىسىندا كۇدىكتىلەر كىناسىن مويىنداپ، پروتسەسسۋالدىق كەلىسىمدەر جاسالعان.

سوت ۇكىمىمەن سوتتالۋشىلاردىڭ ءارقايسىسىنا ق ر ق ك 63-بابى 3-بولىگى قولدانىلىپ، شارتتى تۇردە بەس جىلعا پروباتسيالىق باقىلاۋ ورناتىلىپ، 5 جىلعا باس بوستاندىعىنان ايىرۋ جازاسى بەلگىلەندى.

اۆتور: ەلجان ەرالى