ۇشاقتىڭ قاساقانا قۇلاتىلعانى ەكىنشى «قارا جاشىكتىڭ» مالىمەتتەرىنەن راستالدى
«ءبىرىنشى مالىمەتتەرگە قاراعاندا، كابينادا بولعان ۇشقىش ۇشاقتى 100 فۋت (30 م) بيىكتىككە دەيىن تومەندەتۋ ءۇشىن اۆتو ۇشقىشتى پايدالانعان» دەگەن ازاماتتىق اۆياتسيانىڭ قاۋىپسىزدىك ساراپتاماسى مەن تەرگەۋ بويىنشا بيۋرونىڭ مالىمدەمەسىن Reuters كەلتىردى.
ۇشقىش ۇشاقتىڭ جىلدامدىعىن ارتتىرىپ وتىرعان.
اپاتقا ۇشىراعان A320 ۇشاعىنىڭ ەكىنشى «قارا جاشىگى» جۋىردا تابىلعان. ءبىرىنشىسى 24 - ناۋرىزدا تابىلدى. بىرنەشە كۇننەن كەيىن پروكۋرور مارسەليا بوريس روبەن «قارا جاشىكتەگى» مالىمەتتەرگە قاراعاندا ليۋبيتس ەكيپاج كومانديرى كابينادان شىعىپ كەتكەن سوڭ ۇشاقتى قاساقانا قۇلاتقانىن مالىمدەگەن.
اپاتتان سوڭ تەرگەۋشىلەر ليۋبيتستىڭ ءۇيىن ءتىنتتى. مۇندا ۇشقىشتىڭ ەمدەۋدەن ءوتىپ جاتقانىن راستايتىن ايعاقتار تابىلدى.
31 - ناۋرىزدا «Lufthansa» كومپانياسى ليۋبيتستىڭ 2009 - جىلى جۇمىس بەرۋشىگە كۇيزەلىستەن زارداپ شەككەنىن حابارلاعانى تۋرالى مالىمدەمەنى جاريالاعان. Germanwings-تە ۇشقىشتىڭ بۇل دەرتى جايلى بىلمەگەنىن، ال مەديتسينالىق تەكسەرىستىڭ بارلىعىنان دا ول ءساتتى وتكەنىن ايتتى.
جۋىردا ديۋسسەلدورف پروكۋراتۋراسىندا ليۋبيتس ۇشقىشتار كابيناسى ەسىگىنىڭ قاۋىپسىزدىك جۇيەسى جايلى جانە ءوز- وزىنە قول جۇمساۋدىڭ تاسىلدەرى تۋرالى سۇراستىرعانىن حابارلادى. تەرگەۋگە قاتىسقاندار قازا تاپقاننىڭ كومپيۋتەرىن تەكسەرگەن سوڭ وسىنداي شەشىمگە كەلىپتى.
فرانسيانىڭ الپى تاۋلارىندا اپاتقا ۇشىراعان Germanwings اۋەكومپانياسىنا تيەسىلى Airbus A320 ۇشاعى 24 - ناۋرىزدا اپاتقا ۇشىرادى. سالدارىنان 150 ادام كوز جۇمدى.
