شەكارادا مىلتىقتىڭ اتىلۋى زاڭدى

استانا. قازاقپارات - قازاقستاندىق شەكاراشىلار بىرنەشە مارتە مەملەكەتتىك مەجەدەن زاڭسىز وتكەندەردى وق اتىپ توقتاتۋعا ءماجبۇر بولدى.

«ءورت سوندىرۋشىلەردىڭ ۇيقىسى تىنىش بولسا -  ەلىمىز باي بولادى» دەيتىن ءازىل-شىنى ارالاس ءسوز بار. ال شەكارا قىزمەتىنە قاتىستى بۇل ءسوز كەرىسىنشە ماعىنا بەرەدى. شەكاراشىلار ءسال قالعىپ كەتسە بايلىعىمىز كورشى ەلدەرگە توننالاپ اعادى. سوندىقتان قاي مەملەكەتتىڭ شەكاراسىندا بولماسىن وق اتىلىپ تۇرۋى زاڭدى. قازىرگى كەزدە ەلىمىز بەيبىت ءومىر ءسۇرىپ جاتقانمەن، مەملەكەتتىك شەكارانى كۇندىز-ءتۇنى كىرپىك قاقپاي كۇزەتەتىن جاۋىنگەرلەرگە كەيدە مىلتىق اتۋعا تۋرا كەلەدى.

 بۇدان ەكى كۇن بۇرىن وڭتۇستىك قازاقستان وبلىسىنداعى «قاقپاق» زاستاۆاسىنىڭ شەكارا كۇزەتىنە شىققان كەلىسىمشارت قىزمەتىنىڭ قاتارداعى جاۋىنگەرلەرى ءو. جۇماقوۆ پەن ن. ابدراشيەۆ شەكارانىڭ ارعى بەتىندە بۇقپالاپ كەلە جاتقان ەكى ادامدى بايقاپ، سىرتتارىنان باقىلاپ وتىرادى. بۇلاردىڭ مەملەكەتتىك شەكارانى بۇزىپ وتەتىن قولايلى جەر ىزدەپ جۇرگەندەرى بەلگىلى بولدى.

وزدەرىن ارعى بەتتە قازاقستاندىق شەكاراشىلاردىڭ اڭدىپ وتىرعانىن بۇلار سەزبەگەن بولۋى كەرەك، وڭتايلى ءساتتى پايدالانىپ، بەرى قاراي وتپەكشى بولدى. جاۋىنگەرلەر بۇل تۋرالى راديوبايلانىس ارقىلى زاستاۆاعا حابارلادى. ساناۋلى مينۋتتا زاستاۆا اياعىنان تىك تۇرىپ، كاپيتان ت. جاقىپوۆ باستاعان «دابىل توبى» دەرەۋ سول جاققا اتتاندى.

قازاقستان جەرىنە ءوتىپ كەتكەن شەكارا بۇزۋشىلار «ۋاز» كولىگىن كورىپ ەكى ايىرىلىپ قاشتى. ءبىرىنشىسى بىردەن بەرىلدى، ال ەكىنشىسى قارۋمەن قارسىلىق كورسەتكەن. قويان- قولتىق ۇرىس ادىستەرىن جەتىك بىلەتىن اعا سەرجانت ن. ايداروۆ ونى ءاپ- ساتتە قارۋسىزداندىرىپ، قولعا ءتۇسىردى. ۇستالعاندار اعالى- ءىنىلى جىگىتتەردىڭ ءبىرى قازاقستاننىڭ، ەكىنشىسى وزبەكستاننىڭ ازاماتتارى بولىپ شىقتى. تەرگەۋ بارىسىندا قولعا تۇسكەندەر وزبەكستان جاعىندا ۇرلىق جاساپ، زاڭسىز قارۋ ۇستاعاندارى ءۇشىن سوتتى بولعاندارى انىقتالدى.

قازىر ولارعا قازاقستاننىڭ مەملەكەتتىك شەكاراسىن قاساقانا زاڭسىز بۇزۋعا ارەكەت جاساعانى ءۇشىن جانە بيلىك وكىلىنە قىزمەت بارىسىندا قارسىلىق جاساعاندارى قىلمىستىق ءىس قوزعالعان. شەكارا ناريادى قىراعى قىزمەتى ءۇشىن ناگراداعا ۇسىنىلدى.

شەكارا قىزمەتىنىڭ مايورى وكسانا پارپۋرانىڭ ايتۋىنشا، وسى وقيعانىڭ الدىندا عانا كاسپيي تەڭىزىندە قازاقستان اكۆاتورياسىنا زاڭسىز كىرىپ، ۇستاۋعا حالىقارالىق تىيىم سالىنعان بەكىرە بالىعىن اۋلاپ جۇرگەن كورشى ەلدىڭ براكونەرلەرى ۇستالدى. قىلمىسكەرلەردىڭ قايىعىنان ءبىر تونناعا جۋىق بەكىرە بالىعى شىقتى.

«جاعالاۋ كۇزەتى» وڭىرلىك باسقارما شەكاراشىلارى قازاقستان اۋماعىنا زاڭسىز كىرىپ، بالىق اۋلاپ جۇرگەن ءازىربايجاننىڭ 4 ازاماتىن ۇستادى. شەكارا كۇزەتىنىڭ «تاراز» كەمەسى ەكيپاجىنىڭ تالابىن ورىنداعىسى كەلمەگەن براكونەرلەر جۇيرىك قايىقتارىنا سەنىپ، قازاقستان اۋماعىنان شىعىپ كەتكىسى كەلدى. الايدا شەكارا كەمەسى توبەلەرىنەن ەكى رەت وق اتىپ ەسكەرتۋ جاساعاننان كەيىن ولار قاشىپ قۇتىلا المايتىندارىن ءتۇسىنىپ، بەرىلۋگە ءماجبۇر بولدى. تەكسەرۋ كەزىندە شاعىن ءجۇزۋ قۇرالىنان بالىق اۋلايتىن قۇرالدار سالىنعان 25 جاشىك جانە

جالپى سالماعى 946 كەلى بولاتىن 240 بەكىرە تۇقىمداس بالىق شىقتى. زارداپ شەككەندەر جوق، قازىر وسى فاكت بويىنشا تەرگەۋ جۇمىستارى جۇرگىزىلىپ جاتىر، -  دەيدى مايور وكسانا پارپۋرا.

تورەجان قايىرجان

«ايقىن»