فرانسيادا ۇشاق اپاتقا ۇشىراعان جەردەن ەكىنشى «قارا جاشىك» تابىلدى

استانا. قازاقپارات - فرانسيانىڭ ءالپى تاۋلارىندا اپاتقا ۇشىراعان Germanwings اۋەكومپانياسىنا تيەسىلى Airbus A320 ۇشاعىنىڭ ەكىنشى «قارا جاشىگى» تابىلدى.

بۇل تۋرالى مارسەل پروكۋرورى بريس روبەنگە سىلتەمە جاساي وتىرىپ bbc.co.uk حابارلايدى.

كابيناداعى ۇشقىشتاردىڭ اڭگىمەسى جازىلعان العاشقى «قارا جاشىك» اپات ورىن العان سوڭ كوپ ۇزاماي-اق تابىلعان بولاتىن.

ونداعى جازبالار ءبىرىنشى ۇشقىش كابينادان شىعىپ كەتكەن كەزدە ەكىنشى ۇشقىش - اندرەاس ليۋبيتس ەسىكتى مىقتاپ جاۋىپ، بارسەلونادان ديۋسسەلدورفقا بەت العان ۇشاقتى تاۋ شاتقالدارىنا باعىتتاعانىن راستايدى، دەپ جازادى 24.kz.

ال گەرمانيالىق ىزكەسۋشىلەر قايعىلى جاعداي ورىن العانعا دەيىن ليۋبيتستىڭ ءوزىن-ءوزى ءولتىرۋ جولدارىن ىزدەپ جانە ۇشقىش كابيناسىنىڭ ەسىگىن اشا الماستاي ەتىپ جابۋدىڭ تاسىلدەرىن زەرتتەگەنىن ايتقان بولاتىن. ولار مۇنى ونىڭ پلانشەتتى كومپيۋتەرىن تەكسەرگەن سوڭ انىقتاعان. نەگىزى ەكىنشى «قارا جاشىك» ۇشاقتىڭ تەحنيكالىق جۇيەسىن قاداعالاپ وتىرادى.