الماتىنىڭ ناۋرىزباي اۋدانىنىڭ تۇرعىندارى تەگىن سكرينينگتىك تەكسەرۋدەن ءوتتى

الماتى. قازاقپارات - الماتىدا بۇكىل الەمدىك دەنساۋلىق كۇنىنە وراي ناۋرىزباي اۋدانىنىڭ تۇرعىندارىنا ارنالعان كەڭ كولەمدى «دەنساۋلىق جولى» اكسياسى وتۋدە.

 قالانىڭ جاڭا اۋدانىنىڭ تۇرعىندارىن كوز دارىگەرلەرى، تەراپيەۆتەر، جۇرەك اۋرۋىنىڭ دارىگەرلەرى، وتاشىلار، ءتىس دارىگەرلەرى، سونىمەن قاتار نيەۆروپاتولوگ، ديەتولوگ جانە وتولارينگولوگ سەكىلدى ماماندار تەكسەرىپ، اقىل-كەڭەستەرىن بەردى.

اكسيا كوشپەلى مەديتسينالىق كەشەندەردىڭ كومەگىمەن جۇزەگە اسىرىلدى. ولار ەڭ وزىق تەحنولوگيالارمەن جابدىقتالعان. سولاردىڭ ىشىندە جۇرەك- قان تامىرلارى اۋرۋلارىنا دياگنوستيكا جاساۋ سالاسىندا جاڭادان قولعا الىنعان «كارديوۆيزور» اپپاراتىن ايتۋعا بولادى.

بۇل قوندىرعىلار جولسىزبەن جۇرە بەرەتىن جۇك كولىكتەرىنىڭ بازاسىندا جوبالانعان جانە دالالىق جاعدايدا وتە كۇردەلى زەرتتەۋلەر جۇرگىزە بەرۋگە مۇمكىندىك بەرەدى.

 بۇل كەڭ كولەمدى شاراعا الماتى قالالىق دەنساۋلىق ساقتاۋ باسقارماسىنىڭ جەتەكشىسى جانات قاسىمجانوۆا دا قاتىستى. ول ءوز سوزىندە ەندى مۇنداي شارا اي سايىن قالانىڭ بارلىق اۋداندارىندا وتكىزىلىپ تۇراتىندىعىن جەتكىزدى.

«ءبىز جاڭا ناۋرىزباي اۋدانىنىڭ تۇرعىندارىن ديسپانسەرلىك ەسەپكە الۋ، ساراپتاۋ جانە ءتيىستى ەمدىك شارالار تاعايىنداۋ ماقساتىندا وسىنداي سكرينينگتىك تەكسەرۋ ۇيىمداستىرىپ جاتىرمىز. بۇل اۋداندا 200 مىڭعا تارتا ادام ءومىر سۇرەدى. مىنە، تۇرعىندار اعىلىپ كەلىپ جاتىر. بارلىعى دا دارىگەرلەردىڭ جۇمىستارىنا ءدان ريزا. بۇگىنگى شاراعا بارلىعى 50 مامان جۇمىلدىرىلدى. ولاردىڭ 30-ى عىلىمي قىزمەتكەرلەر جانە ەكى ۋنيۆەرسيتەتتىڭ الدىڭعى قاتارلارى پروفەسسورلارى» - دەدى باسقارما باسشىسى.

بۇگىنگى اكسيانى الماتى قالاسىنىڭ دەنساۋلىق ساقتاۋ باسقارماسى، قازاقستان- رەسەي مەديتسينالىق ۋنيۆەرسيتەتى جانە قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى ۇيىمداستىردى.

اۆتور: جاپپاربەرگەن ايبوتا