قىرعىزستاندا اقشا ايىرباستاۋ پۋنكتەرى جابىلۋى مۇمكىن
قىرعىزستان باس قارجىگەرىنىڭ مالىمدەۋىنشە، جەكەمەنشىك پۋنكتەر ىشكى نارىقتاعى شارتتاردى ءجيى بۇزىپ، باس پايداسىن كوبىرەك ويلايتىن بولعان.
ليتسەنزياسىز جۇمىس ىستەۋ، زاڭسىز قىزمەت ەتۋ، شەتەلدىك ۆاليۋتاعا، ونىڭ ىشىندە دوللارعا دەگەن سۇرانىستى قولدان جاساۋ ارقىلى قوعامدا دۇربەلەڭ تۋدىرۋ. بۇلار قىرعىزستاننىڭ ۇلتتىق بانكى اتاپ وتىرعان ارىز-شاعىمداردىڭ ءبىر عانا بولىگى.
ءبىراق وسىلاردىڭ ءوزى «بارلىق جەكەمەنشىك ايىرباستاۋ پۋنكتەرىن جابۋ كەرەك» دەگەن تالاپتى قويۋعا جەتكىلىكتى بولىپ تۇر. ال جەرگىلىكتى بيلىك ولاردىڭ ورنىنا كوممەرتسيالىق بانكتەر مەن سانى شەكتەۋلى قارجى ۇيىمدارى اشىلۋى ءتيىس دەپ سانايدى.
جوومارت وتوربايەۆ، ق ر پرەمەر-ءمينيسترى:
- بۇل سالادا شىنىندا دا زاڭ كوپ بۇزىلادى. ولاردىڭ ءبىرازى ليتسەنزياسىز جۇمىس ىستەپ جاتىر. ۇلتتىق بانك ءوزى ايتىپ وتىرعانداي، وسى باعىتتا ءتارتىپ ورناتۋى ءتيىس. ونىڭ ۇستىنە زاڭسىز قىزمەت ءۇشىن ايىپپۇل كولەمىن بىرنەشە ەسە كوتەرۋ قاجەت.
بۇگىندە بۇكىل قىرعىزستان بويىنشا 3300 دەن استام جەكەمەنشىك ايىرباستاۋ پۋنكتى جۇمىس ىستەيدى. ءبىراق ولاردىڭ تەك %25 ىنىڭ عانا ليتسەنزياسى بار. باسقالارىنىڭ ءىس-ارەكەتى ارنايى رەگلامەنتپەن رەتتەلەدى.
وزدەرى وسى ءتارتىپ جەتكىلىكتى دەيتىن كورىنەدى. ولار جەكەمەنشىك ايىرباستاۋ پۋنكتەرى شەتەلدىك ۆاليۋتانى قايتا ساتۋ ارقىلى ۇلكەن پايدا تاۋىپ وتىرعان كوممەرتسيالىق بانكتەر ءۇشىن تەجەۋشى فاكتور ەكەنىن العا تارتادى.
كۋبانىچبەك كويچۋمانوۆ، ايىرباستاۋ بيۋروسىنىڭ يەسى:
- ايىرباستاۋ پۋنكتەرىندەگى مارجا 63,85 تە 64 دەپ كورۋگە بولادى. ياعني 15 تيىن. دەمەك ءجۇز دوللار ساتىپ، سوسىن قايتا ساتىپ الۋ ارقىلى ءبىر بولكە نان عانا الا الاسىز. ال بانكتە كەمىندە 50 تيىن. ەگەر ءبىز بولماساق، ولار ۇيالماستان مارجانى 2 سومعا بەلگىلەپ، ءبارىمىز سوعان ۇيرەنىپ قالار ەدىك.
ۇلتتىق بانكتىڭ جەكەمەنشىك ايىرباستاۋ پۋنكتەرىن ءبىرجولا جابۋ ۇسىنىسى پارلامەنتكە بەرىلدى. ەندى ءتيىستى زاڭعا وزگەرىستەر ەنگىزۋ ماسەلەسى دەپۋتاتتاردىڭ قۇزىرىندا. ءبىراق بۇل قيىنعا سوعارى انىق.
سەبەبى حالىق قالاۋلىلارى ۇلتتىق بانكتىڭ ۇسىنىسىن قولداسا، وندا مىڭداعان قىرعىزستاندىق بيزنەسىنەن ايىرىلىپ، ەلدەگى جۇمىسسىزدار قاتارى ارتۋى مۇمكىن.
www.24.kz
