ءساندى كيىم سايرام اۋدانىندا تىگىلەدى

استانا. قازاقپارات - وڭتۇستىك قازاقستان وبلىسىندا «التىن ادام» برەندىمەن تىگىلىپ جاتقان ەرلەر كوستيۋمى ءساندى كيىنەتىن تۇرعىنداردىڭ كوڭىلىنەن شىققان سوڭ، دۇكەندەردەگى ساتىلىم ارتا باستاعان.

تۇتىنۋشىنىڭ سۇرانىسىن ەسكەرىپ كيىم تىگەتىن فابريكا جۇمىسىنىڭ جاندانىپ كەتۋىنە «دامۋ» قورىنىڭ سەپتىگى ءتيىپتى.

سوڭعى ۇلگىدەگى اۆتوماتتاندىرىلعان تىگىن ماشينالارىن ساتىپ الۋعا بەرىلگەن نەسيە پايىزىنىڭ جارتىسىن تولەپ تۇرادى. فابريكا ەۋروۇلگىدە تىگىلىپ جاتقان كوستيۋمدەرىن قازاقستانداعى ءىرى ساۋدا ورىندارىنا شىعارىپ ساتۋدا.

فابريكانىڭ ىرگەسىندەگى دۇكەندە وزدەرى تىككەن دايىن ونىمدەر ساتىلادى. ءوزىن تالعاممەن كيىنەتىندەردىڭ قاتارىنا قوياتىن راحماتۋللا يكراموۆ تەك وسى ساۋدا ورنىنان كوستيۋم الىپ كيەتىنىن ايتادى.

راحماتۋللا يكراموۆ، قالا تۇرعىنى:

- مىنە، ءوزىڭىز ايتىڭىز، قاي جەرىندە نۇقسان بار. ايتا الاسىز با، ايتا المايسىز. نەگە؟ تىگىلگەنى وتە ادەمى. شەتەلدىكىنەن كەم جەرى جوق. ساپاسى دا كوڭىل كونشىتەرلىك.

وتاندىق نارىقتا ساپالى كيىمىمەن ەندى تانىلا باستاعان فابريكادا جۇمىس ىستەيتىن شەبەرلەردى شەتەلدىك ۇستالار وقىتقان ەكەن. ويتكەنى تىگىن ماشينالارى مەيىلىنشە اۆتوماتتاندىرىلعان. ولاي بولماسا، ءساندى كيىمدەردى كوپ جانە ساپالى ەتىپ تىگە المايسىڭ. العاشىندا اۋىسىمدا 50 كوستيۋم تىكسە، قازىر ونىمدىلىك ون ەسەدەي ارتقان.

قويمادا قالىپ قويىپ جاتقان كيىم جوق. تىگىلگەنىنىڭ بارلىعى ساتىلىپ كەتەدى. بۇل تۇتىنۋشىنىڭ كوڭىلىنەن شىعاتىن ءساندى كوستيۋم تىگىلىپ جاتقاندىقتان دەپ سانايدى مۇنداعىلار. شىعارىپ جاتقان ءونىمى ساپالى بولعان سوڭ، فابريكاعا تۇرعىنداردان تاپسىرىس ءتۇسىپتى. بۇل وتاندىق ءونىمنىڭ ارتىقشىلىعىن بىلدىرسە كەرەك.

بالجان قالمۇراتوۆا، «التىن ادام» تىگىن فابريكاسى ديرەكتورىنىڭ ورىنباسارى:

- بيىلدان باستاپ ەر بالالارعا دا، قىز بالالارعا دا ارناپ مەكتەپ فورماسىن تىكسەك دەپ ءجۇرمىز. وبلىسىمىزداعى مەكتەپتەردى ءوزىمىزدىڭ وتاندىق، ساپاسى جوعارى تاۋارىمىزبەن قامتاماسىز ەتسەك دەگەن ويدامىز. سوندىقتان جۇمىس ورنىن ەكى ەسەگە كوبەيتسەك دەيمىز.

فابريكادا قازىر 135 ادام جۇمىس ىستەيدى. كورشى عيماراتتاعى ورىندى قوسىپ الىپ، ءوندىرىس اۋماعىن دا كەڭەيتىپ جاتىر.

www.24.kz