اسكەريلەر تۋ ۇستاپ ءجۇرۋدى ۇيرەندى - فوتو
«قازىرگى ۋاقىتتا تۋ ۇستاۋشىلار توبىنىڭ اسكەري قىزمەتشىلەرى تۋدىڭ نۇسقالارى مەن جاۋىنگەرلىك تۋلاردى قولدانۋدى جاتتىعۋدا. نىشانداردىڭ ەرەكشە قۇندىلىعىن ەسكەرە وتىرىپ، اتالعان تۋلار قورىتىندى رەپەتيسيالاردا جانە ناقتى پاراد وتەتىن كۇنى قولدانىلاتىن بولادى»، - دەلىنگەن باسپا ءسوز حابارلاماسىندا.
ۆەدومستۆو وكىلدەرىنىڭ ايتۋىنشا، بۇل تۋلاردىڭ بارلىعى دا الدا وتەتىن ۇلى وتان سوعىسىنداعى جەڭىستىڭ 70 جىلدىق مەرەيتويىنا ارنالعان اسكەري پارادتا قولدانىلادى. «مەملەكەتتىك تۋ ەگەمەندى ەلىمىزدىڭ ءرامىزى، ال جاۋىنگەرلىك تۋلار وتكەن عاسىرلاردان بەرى ارميانىڭ ەرەكشە بەينەسى رەتىندە قىزمەت ەتىپ كەلەدى. بۇگىندە جاۋىنگەرلىك تۋ قارۋلى كۇشتەردىڭ تاۋەلسىزدىگىن، بايلىعىن جانە جاۋىنگەرلىك ازىرلىگىن سيپاتتايدى. سوندىقتان ولاردى پارادقا الىپ شىعۋدىڭ ءوزى دە ەرەكشە سالتاناتتى ءراسىم. بۇل ورايدا اسكەري قىزمەتشىلەر اتالعان ءراسىمدى ۇلكەن قۇرمەتپەن ورىندايدى»، - دەدى ۆەدومستۆوداعىلار.
ەسكە سالا كەتەيىك، وسىعان دەيىن مەملەكەتتىك تۋ جانە جاۋىنگەرلىك تۋلار 2005، 2009، 2011، 2014 -جىلدارداعى اسكەري پارادتا، سونىمەن قاتار 2013 -جىلعى وتاردا وتكەن پارادتا قولدانىلدى. الداعى اسكەري پاراد بارىسىندا پاراد قولباسشىسىنىڭ باستاۋىمەن تۋ الىپ جۇرەتىن توپ قۇرامى (ءار توپ ءۇش ادام) ق ر مەملەكەتتىك تۋىن الىپ وتەدى.
بۇل پارادتىڭ رەسمي اشىلۋى بولىپ سانالادى. ال جەكە اسكەر ءتۇرى مەن تەگى، بولىمشەلەر مەن وقۋ ورنىنىڭ جاۋىنگەرلىك تۋلارىن ۇستاعان اسكەري قىزمەتشىلەر ءاربىر جاياۋ اسكەر لەگىن باستاپ وتەدى.
