حالىقارالىق كينوفەستيۆالدە ەرمەك تۇرسىنوۆتىڭ شىنايى وقيعا جەلىسىنە قۇرىلعان «جات» ءفيلمى كورسەتىلەدى

الماتى. قازاقپارات - بەلگىلى قازاقستاندىق كينورەجيسسەر ەرمەك تۇرسىنوۆ ۆەنەتسيا حالىقارالىق كينوفەستيۆالىندە ءوزىنىڭ «جات» دەپ اتالاتىن جاڭا كينوتۋىندىسىن كوپشىلىك نازارىنا ۇسىنادى.

بۇل تۋرالى ول بۇگىن ارنايى باسپا ءسوز ءماسليحاتى بارىسىندا ءمالىم ەتتى.

 رەجيسسەردىڭ ايتۋىنشا، بۇل فيلمدە وتباسىن، جۇرتىن تاستاپ، تاۋعا كەتىپ، جالعىز ءوزى ءومىر سۇرگەن بالانىڭ تاعدىرى تۋرالى ايتىلادى. فيلم ومىردە بولعان شىنايى وقيعا جەلىسىنە قۇرىلعان.

«جيىرماسىنشى عاسىر قازاق حالقى ءۇشىن ۇلكەن بەتبۇرىستى كەزەڭ بولدى. 1931-1951 -جىلداردى مەن قازاق حالقى ءۇشىن ەڭ اۋىر، ەڭ قيىن كەزەڭ دەپ ەسەپتەيمىن. وسى شاقتا حالقىمىز تالاي ناۋبەتتى باستان كەشتى، اشتىقتى دا، قۋعىن-سۇرگىندى دە كوردى. كەيىن ۇلى وتان سوعىسى باستالدى. تالاي بوزداعىنان ايىرىلدى. قۋعىن-سۇرگىن جالعاسىپ جاتتى. ودان كەيىن ستالين كوز جۇمدى. مىنە، بۇل فيلم وسى كەزەڭگە ارنالعان»، - دەدى رەجيسسەر.

ەرمەك تۇرسىنوۆتىڭ ايتۋىنشا، ول بۇل كينوتۋىندىعا كوپ ۋاقىتىن جۇمساپتى. فيلم وسى ايدىڭ اياعىندا تولىعىمەن دايىن بولادى.

«جات» دەپ اتالاتىن بۇل ءفيلمدى مەن بيىلعى ۆەنەتسيا كينوفەستيۆالىنە دايىنداپ جاتىرمىن»، - دەدى ە. تۇرسىنوۆ.

ايتا كەتەلىك، جىل سايىن وتكىزىلىپ تۇراتىن ءداستۇرلى ۆەنەتسيا كينوفەستيۆالى (يتاليا) ۇستىمىزدەگى جىلدىڭ تامىز ايىنىڭ سوڭىندا، دالىرەك ايتقاندا 26 - تامىز بەن 5 - قىركۇيەك ارالىعىندا ۆەنەتسيا قالاسىنىڭ ليدو ارالىندا وتەدى. فەستيۆالدىڭ باستى ماراپاتى - «التىن ارىستان» جۇلدەسى.

اۆتور: جاپپاربەرگەن ايبوتا