مەملەكەت باسشىسى اقتوبە وبلىستىق كوپسالالى اۋرۋحاناسىندا بولدى

استانا. قازاقپارات - مەملەكەت باسشىسى نۇرسۇلتان نازاربايەۆ بۇگىن اقتوبە وبلىسىنا جۇمىس ساپارى بارىسىندا وبلىستىق كوپسالالى اۋرۋحانادا بولدى، دەپ حابارلادى اقوردانىڭ باسپا ءسوز قىزمەتى تۆيتتەردەگى پاراقشاسىندا.

وبلىستىق كوپسالالى اۋرۋحانا 2014 - جىلدىڭ قاڭتار ايىندا ەلباسىنىڭ «100 مەكتەپ، 100 اۋرۋحانا» مەملەكەتتىك باعدارلاماسىنىڭ اياسىندا 320 ورىنعا ارنالىپ سالىنعان بولاتىن. ونى سالۋعا 11,8 ميلليارد تەڭگە ينۆەستيتسيالار جۇمسالدى.

اۋرۋحانا حالىقارالىق ستاندارتتار بويىنشا سالىنىپ، زاماناۋي دياگنوستيكالىق جانە ەمدەۋ جابدىقتارىمەن قامتىلعان. مەديتسينالىق تەحنيكانىڭ جەتەكشى الەمدىك شىعارۋشىلارىنىڭ سوڭعى دياگنوستيكالىق جانە ەمدىك جابدىقتارى: 1,5 تەسلا ماگنيتتىك-رەزونانستىق توموگرافى، انگيوگرافيالىق قۇرىلعى، رەنتگەنولوگيالىق جابدىقتار، تازا بولمەلەر جۇيەسى، ەندوسكوپيالىق جانە رەانيماتسيالىق جابدىقتار، مەديتسينالىق گازدار جۇيەسى، ەكسپەرتتىك كلاستاعى زاماناۋي ۋلترادىبىستىق سكانەرلەر، «جاساندى بۇيرەك» جانە «جاساندى باۋىر» اپپاراتتارى، باروكامەرالار ورناتىلدى.

ەمدەۋ ۇيىمىنىڭ كادرلىق قۇرامى مەن تەحنيكالىق جابدىقتاندىرىلۋى قالا، وبلىس جانە بۇكىل باتىس ايماعىنىڭ تۇرعىندارىنا گوسپيتال قىزمەتتەرىنىڭ تولىق كولەمىن، سونىڭ ىشىندە كەز كەلگەن اعزانى زەرتتەۋ مۇمكىندىگىن بەرىپ وتىر.