ۆيتسە-ءمينيستر اقمولا وبلىسىنداعى سۋ تاسقىنى قاۋپى بار ايماقتاردى تىكۇشاقپەن باقىلاپ شىقتى - فوتو

كوكشەتاۋ. قازاقپارات - بۇگىن ق ر ءى ءى م ۆيتسە-ءمينيسترى ۆلاديمير بوجكو اقمولا وبلىسىنىڭ اۋماعىنداعى كوكتەمگى سۋ تاسقىنى قاۋپى بار ايماقتاردى تىكۇشاقپەن باقىلاپ شىقتى. ق ر ءى ءى م ۆيتسە-ءمينيسترىنىڭ قاسىندا اقمولا وبلىسىنىڭ اكىمى سەرگەي كۋلاگين بولدى.

تىكۇشاق بورتىندا بولعان ق ر ءى ءى م ورىنباسارى مەن اقمولا ءوڭىرىنىڭ باسشىسى استانا (ۆياچەسلاۆ)، سىلەتى سۋ قويمالارىن مۇقيات قاراپ، اقمولا وبلىسىنىڭ ساندىقتاۋ، اتباسار، قورعالجىن اۋداندارىنىڭ سۋ تاسقىنى قاۋپى بار وزەندەرىنىڭ (سىلەتى، ەسىل، جاباي، نۇرا) جاعدايلارىن، سۋ توراپتارىنىڭ تاسقىن سۋلاردى وتكىزۋگە دايىندىقتارىن تەكسەردى. ەڭ الدىمەن اتباسار اۋدانىنداعى زارەچنىي جانە سوچينسكوە اۋىلدارىنىڭ اۋماعىنا جاقىن ورنالاسقان جاباي وزەنىنىڭ جاعدايىنا كوڭىل ءبولىندى.

اۋەدەن باقىلاۋدىڭ ەڭ العاشقى نىسانى سىلەتى سۋ قويماسىنىڭ سۋ تورابى بولدى. بۇل جەردە ءوڭىر باسشىسى كورشى وبلىستاردىڭ ەلدى مەكەندەرى مەن جاقىن اۋىلدارىن سۋ باسۋ قاۋپىن بولدىرماس ءۇشىن ونداعى جيناقتالعان سۋدى اعىزىپ جىبەرۋدە مۇقيات بولۋ قاجەتتىگىن ايتتى.

2015 -جىلعى 25 -ناۋرىزداعى جاعداي بويىنشا اتباسار، ارشالى، ەگىندىكول، ساندىقتاۋ، استراحان، جاقسى اۋداندارىندا قار قورى 2014 -جىلمەن سالىستىرعاندا 60 پايىزعا اسىپ تۇسەدى. ەسىل، سىلەتى، شاعالالى وزەندەرىنىڭ الاپتارىندا قار قورى ادەتتەگىدەن 30-40 پايىزعا جوعارى. قار مەن مۇز ەرىگەن كەزدە ەسىل، سىلەتى، شاعالالى، نۇرا وزەندەرىندەگى سۋدىڭ كولەمى ارتادى دەپ كۇتىلۋدە.

وسىعان بايلانىستى ءىرى سۋ قويمالارىنداعى سۋ كولەمىن رەتتەۋگە ەرەكشە كوڭىل ءبولىنىپ وتىر. وسى ماقساتتا استانا، سەلەتى، شاعالالى سۋ قويمالارىندا جوسپارلى سۋ ىعىستىرۋ جۇمىستارىن جۇرگىزۋ كوزدەلگەن.

اتباسار اۋدانىنا كەلگەن وبلىس اكىمى اۋىل شارۋاشىلىعى قۇرىلىمدارى مەن كاسىپورىن باسشىلارى باسشىلارىمەن كەزدەستى. ول جەردە بۇگىنگى كۇنى ءوڭىر ايماعىندا 4 اۋداندا سۋ تاسقىنى بولۋ ءقاۋپى بار ەكەنى ايتىلدى، ونىڭ ىشىنە اتباسار اۋدانى دا كىرەدى. كەزدەسۋدە سەرگەي كۋلاگين سۋ تاسقىنىنىڭ الدىن الۋ شارالارىنا ءجۇز پايىز دايىن بولۋ قاجەتتىگىن اتاپ ءوتتى. بۇل جەردە تج بويىنشا سۋ تاسقىنىنىڭ الدىن الۋ شارالارىنا جۇمىلدىرىلعان اپاتتىق- قۇتقارۋ تەحنيكاسىنىڭ دايىندىعى پىسىقتالدى.

2015 -جىلدىڭ 30 -ناۋرىزىنداعى جاعداي بويىنشا وبلىس قالالارى مەن اۋداندارىندا تاسقىن سۋلاردى وتكىزۋ ءۇشىن 653 مىڭ تەكشە مەتر قار شىعارىلعان، وسى جۇمىستارعا 258 تەحنيكا تارتىلعان. اعىن سۋدى اينالدىرىپ وتكىزۋ ءۇشىن اعىمداعى جىلى جالپى ۇزىندىعى 21 مىڭ مەتر ارىق تازارتىلدى. بۇل جۇمىستارعا 253 ادام مەن 108 تەحنيكا تارتىلدى.

سونداي-اق 31,1 مىڭ توننا ينەرتتى ماتەريالدار، 12,6 مىڭ دانا قاپ، 241,5 توننا مولشەرىندە جانار- جاعار ماي قورى ءبولىندى.