ورالدىق وقۋشىلار كيىزدەن ۇلتتىق كيىم تىگۋدى ۇيرەنۋدە

استانا. قازاقپارات - ورالداعى ەستۋ جانە سويلەۋ قابىلەتى بۇزىلعان بالالارعا ارنالعان مەكتەپ- ينتەرناتىنىڭ وقۋشىلارى كيىزدەن ۇلتتىق كيىم تىگۋ ءىسىنىڭ قىر- سىرىنا قانىعۋدا.

ولاردىڭ قولىمەن جاسالعان كيىم ۇلگىلەرى مەن كيىز بۇيىمدار كوللەكسياسى پەنزادا وتكەن X «ەڭ ءساندى اۋلا-2014» حالىقارالىق فەستيۆالىندە ءبىرىنشى ورىندى جەڭىپ الدى.

اتالعان بايقاۋ حالىقارالىق ءسان تەاترلارى قاۋىمداستىعىنىڭ قامقورلىعىمەن رەسەيدە جىل سايىن ۇيىمداستىرىلىپ تۇرادى. كيىز باسۋ وڭاي شارۋا ەمەس. ول ۇلكەن ەڭبەكتى، قاجىر- قايراتتى تالاپ ەتەدى. وسى ونەردىڭ قىر-سىرىن جەتىك مەڭگەرگەن يرينا سكوريكوۆا وقۋشىلارعا كيىز باسۋدىڭ وتە جەڭىل ءتۇرىن ۇيرەتۋدە. قويدىڭ ءجۇنىن بىرنەشە قابات ەتىپ توسەپ، وعان سابىننىڭ كوبىگىن جاقسىلاپ تۇرىپ سىڭدىرەدى.

سودان كەيىن جارتى ساعات بويى كيىز باسىپ، ونى تازا سۋمەن شايىپ، كەپتىرەدى. كيىزدىڭ ساپالى بولۋى ءۇشىن مىندەتتى تۇردە كىر سابىننىڭ كوبىگى قاجەت. بۇرىنعى اجەلەرىمىزدىڭ بارلىعى وزدەرى الابوتا، كۇل، سۇيەك سالىپ قايناتقان سول سابىنداردى پايدالانىپ كەلدى.

يرينا سكوريكوۆا، شەبەر:

- كيىز باسىپ، ودان كيىم تىگۋ قازاق حالقىنىڭ قانىنا ابدەن سىڭگەن. قازىر وسىناۋ قولدانبالى ونەرمەن كۇللى الەم اينالىسا باستادى. ودان شاپان، شالبار، باس كيىم، كيىز بوقشا، ايەلدەر ۇستايتىن سومكە دەيسىز بە، بارلىعىن جاسايدى. تابيعي تۇرعىدان تازا بولعاندىقتان جۇرتتىڭ وعان دەگەن قىزىعۋشىلىعى ۋاقىت وتكەن سايىن ارتا تۇسۋدە. كيىزدەن جاسالعان باس كيىمدى كيىپ جۇرسەڭىز، بىرىنشىدەن، ول باسىڭىزدى كۇننەن قورعايدى. سوسىن كوپتەگەن ادامدار كيىز كيىم قاتتى تەرلەتەدى دەپ ويلايدى. ءبىراق، ول مۇلدە ولاي ەمەس.

باتىس قازاقستان وبلىستىق ەستۋ جانە سويلەۋ قابىلەتى بۇزىلعان بالالارعا ارنالعان مەكتەپ- ينتەرناتىنىڭ وقۋشىلارى كيىزبەن جۇمىس ىستەۋدى وتكەن جىلى ۇيرەنە باستادى. مۇندا «سىمبات» ءسان ۇلگىسى ۇيىرمەسى جۇمىس ىستەيدى.

مىنە وسى از عانا ۋاقىتتىڭ ىشىندە ولار ۇلكەن ناتيجەلەرگە قول جەتكىزىپ ۇلگەردى. وقۋشىلار ۇستازدارىنىڭ كومەگىمەن كيىز باسىپ قانا قويماي، ءوز بەتىنشە كيىم ءپىشىپ، تىگۋدى دە ۇيرەنىپ العان. ءتۇرلى اشەكەيلەر جاساپ، اياق كيىمدەرگە دەيىن وزدەرى باسادى. ءتىپتى مەكتەپ وقۋشىلارىنىڭ قولىنان شىققان كيىم ۇلگىلەرى مەن كيىز بۇيىمدار توپتاماسى پەنزادا وتكەن ونىنشى «ەڭ ءساندى اۋلا-2014» حالىقارالىق فەستيۆالىندە ءبىرىنشى ورىندى جەڭىپ الدى.

نۇرلىگۇل قادىروۆا، وبلىستىق ەستۋ جانە سويلەۋ قابىلەتى بۇزىلعان بالالارعا ارنالعان مەكتەپ- ينتەرناتىنىڭ مۇعالىمى:

- ەندى وسى بۇرىنعى كەزدە ءبىزدىڭ سالت- داستۇرىمىزدە، قولونەرىمىزدە كوپتەن قولدانىلعان ءبىر ونەردىڭ ءتۇرى عوي بۇل جۇننەن كيىز باسۋ، ودان ءارتۇرلى بۇيىمدار جاساۋ. ەندى كوپ جىلدار بۇل ۇمىتىلىپ قالدى. سول اتا- بابامىزدىڭ ءۇردىسىن سوڭعى ءبىر 2-3 جىلدا ءبىزدىڭ مىنا ەڭبەك مۇعالىمدەرىمىز وقۋشىلارعا ۇيرەتۋدە. وسى ءۇردىستى جالعاستىرۋدا.

 ماسەلەن مىنا كوللەكسيانى ازىرلەۋ ءۇشىن ەكى ايداي ۋاقىت كەتىپتى. ول 10 كەلى جۇننەن جاسالعان جانە ءبىر ايتا كەتەرلىگى - ەشقانداي جەلىم پايدالانىلماعان. مىنا كارتينالار دا كيىزدەن. ءبىراق انىقتاپ قاراماساڭىز ونىڭ كيىزدەن جاسالعانىن بايقاماۋىڭىز مۇمكىن. بۇل جۇمىستار بالالاردىڭ وي- قيالىنىڭ ۇشقىرلىعىن جانە ەڭبەكقورلىعىن كورسەتەدى. مىنە، وسىلايشا اتادان بالاعا ميراس بولىپ كەلە جاتقان ۇلتتىق قولونەرىمىز قايتا جاڭعىرىپ، دامۋ ۇستىندە.

www.24.kz