شىمكەنتتە «قازىنا» ەتنو- تاريحي كەشەنى اشىلدى - فوتو

شىمكەنت. قازاقپارات - شىمكەنت قالاسىنىڭ جاڭا اۋدانىندا «قازىنا» ەتنو- تاريحي كەشەنى اشىلدى.

جاڭا كەشەننىڭ اۋدانى 75 گەكتار جەردى قۇرايدى، دەپ حابارلايدى وبلىستىق اكىمدىكتىڭ باسپا ءسوز قىزمەتىنەن. «بايدىبەك ءبي» ەسكەرتكىشى، «ناۋرىز» الاڭى، تاريح- ولكەتانۋ مۇراجايى، داستۇرلەر مەن سالتتار ورتالىعى، يپپودروم ەندى ءبىرىڭعاي ساۋلەت انسامبلىنە بىرىكتىرىلدى.

ەتنوساياباقتا ايماقتىڭ تاريحي- مادەني ەسكەرتكىشتەرىنىڭ 27 ماكەتى ورناتىلعان، ال ورتالىقتا ديامەترى 21 مەتر بولاتىن ءتۇرلى-ءتۇستى سۋبۇرقاق قويىلعان.

ەتنو- تاريحي كەشەندە قازاق حاندىعىنىڭ 550 -جىلدىعىنىڭ قۇرمەتىنە سالىنعان نىسان تۇر. ەسكەرتكىشتىڭ بيىكتىگى 15 مەتردى قۇرايدى، ول قازاق ۇلتتىق ويۋلارى سالىنعان ورىلگەن ەكى اركادان تۇرادى. ەسكەرتكىشتىڭ ورتاسىندا بيىكتىگى 10 مەتر، ەنى 8 مەتردى قۇراعان پيراميدالىق كومپوزيتسيا ورناتىلدى. پيراميدانىڭ شەتىندە قازاق حاندىعىنىڭ بارەلەفتىك كومپوزيتسياسى مەن «قازاق حاندىعىنا 550  جىل»، «قازاق حاندىعىنىڭ 550 جىلدىعى بۇل ۇلتتىق تاريحتى ۇلىقتاۋ مەن بۇگىنگى جەتىستىكتەردى لايىقتى باعالاۋ. ن. ءا. نازاربايەۆ» جانە ت. ب. سوزدەر ويىلىپ جازىلعان.

«جايلاۋكول» كولىنىڭ جاعالاۋىنداعى ەسكەرتكىشتىڭ قاسىندا قازاق اۋىلى ورىن تەپكەن. جاعالاۋداعى دەمالىس ايماعىنىڭ اۋماعى 15 گەكتاردى قۇرايدى. مۇندا 4 روتوندا ورناتىلىپ، قايىق ستانساسى، كولىك تۇراعى جابدىقتالعان. بۇل ەتنو- تاريحي كەشەن قالالىقتاردىڭ سۇيىكتى دەمالىس ورنىنا اينالادى دەپ كۇتىلۋدە.