مەملەكەت كولىك ساتىپ الۋ ءۇشىن قازاقستاندىقتارعا جەڭىلدەتىلگەن نەسيە ۇسىنباق

استانا. قازاقپارات - ق ر ۇكىمەتى اۆتوكولىك ساتىپ الۋ ءۇشىن قازاقستاندىقتارعا جەڭىلدەتىلگەن نەسيەلەۋگە قارجى بولمەك.

بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر قارجى ۆيتسە- ءمينيسترى رۋسلان دالەنوۆ ءمالىم ەتتى.

«نۇرلى جول» باعدارلاماسىن جۇزەگە اسىرۋدان بولاتىن جەتىستىكتەر ماسەلەسىنە توقتالعان ول: «ەلىمىزدىڭ ازاماتتارى جەڭىلدەتىلگەن نەسيەمەن تەك وتاندىق كولىكتەرگە قول جەتكىزە الادى. ونىڭ مولشەرلەمەسى 3 پايىزدان اسپايدى جانە 3-5 جىل مەرزىمگە نەگىزدەلگەن. نەسيە تەڭگەمەن عانا بەرىلەدى»، - دەدى ءمينيستردىڭ ورىنباسارى.

وسى ورايدا ول بۇل ماقساتتا 15 ميلليارد تەڭگە بولىنەتىندىگىن اتاپ ءوتتى. بۇل قارجى شامامەن 4-6 مىڭ اۆتوكولىكتى ساتىپ الۋعا جەتەدى.

«ارينە، كولىكتەردىڭ قۇنى مەن سانى تۇتىنۋشىنىڭ قانداي مودەل مەن ونىڭ قۇرامدانۋىن تاڭداۋىنا بايلانىستى بولادى»، - دەپ اتاپ ءوتتى ۆيتسە-مينيستر.

اۆتور: رۋسلان عابباسوۆ