اتاقتى ۆەلوشاباندوز ۇشاقتىڭ رەيسىنە كەشىگىپ، اجالدان امان قالدى

استانا. قازاقپارات - كەزىندە Telekom ۆەلوكومانداسىنىڭ نامىسىن قورعاعان اتاقتى نەمىس شاباندوزى رولف الداگ Germanwings كومپانياسىنىڭ 4U9525 رەيسىنە كەشىگىپ قالىپ، اۋە كولىگىنىڭ اپاتىنان امان قالدى.

سپورتشى 24 - ناۋرىز كۇنى يسپانيادان گەرمانياعا قايتۋى ءتيىس بولعان. ول ديۋسسەلدورفكە جەتۋ ءۇشىن Airbus A320 ۇشاعىمەن 4U9525 رەيسى بويىنشا ۇشاتىن بولىپتى. ءبىراق ۇشۋ كەستەسىنەن تابىلعان قاتەلىكتىڭ سالدارىنان الداگ ۇشاققا كەشىگىپ، ساپارىن كەيىنگە قالدىرادى.

ەستەرىڭىزگە سالا كەتەيىك، 24 - ناۋرىزدا يسپانيادان گەرمانياعا 4U9525 باعىتى بويىنشا ۇشقان Lufthansa اۋە كاسىپورنىنا قاراستى Germanwings كومپانياسىنىڭ ۇشاعى فرانسيانىڭ ءالپى تاۋلارىنا قۇلاپ، اپاتقا ۇشىرادى. لاينەردىڭ ەكيپاجىندا بولعان 150 ادامنىڭ بارلىعى قازا تاپتى. بەلگىلى بولعانداي، «دالكۋرد» فۋتبول كومانداسىنىڭ ويىنشىلارى دا سول رەيسكە بيلەتتەر الىپ تۇرىپ، ءدال ساپارعا شىعار الدىندا شەشىمدەرىن وزگەرتىپ، ولىمنەن امان قالعان ەكەن.

www.24.kz