رەسەيدە وتكەن بايقاۋدا باتىس قازاقستاندىق دومبىراشىلار جۇلدەلى ورىن يەلەندى

ورال. قازاقپارات - رەسەي فەدەراتسياسى استراحان وبلىسى ۆولودار اۋدانىنىڭ قۇرمانعازى اتىنداعى مادەنيەت ورتالىعىندا «زۆۋچي، مويا دومبرا!» اتتى ايماقارالىق دومبىراشىلار بايقاۋى مارەگە جەتتى.

ب ق و حالىق شىعارماشىلىعى ورتالىعىنان تۇسكەن مالىمەتكە قاراعاندا، ءداستۇرلى كۇيشىلەر سايىسىنا وبلىستىق مادەنيەت، مۇراعاتتار جانە قۇجاتتاما باسقارماسىنىڭ قولداۋىمەن بوكەي ورداسى اۋداندىق مادەني- دەمالىس ورتالىعىنىڭ قىزمەتكەرلەرى جاسۇلان اباحانوۆ پەن ازامات زاينۋللين قاتىستى. بايقاۋ قورىتىندىسىندا جاسۇلان ەكىنشى جۇلدەنى يەلەنسە، ازامات ءۇشىنشى ورىنعا كوتەرىلدى.

ايتا كەتەيىك، اتالمىش بايقاۋ 2009 - جىلدان بەرى وتكىزىلىپ كەلەدى. باستاپقىدا وبلىستىق دەڭگەيدە بولسا، كەيىن ايماقارالىق سايىستا استراحانمەن قاتار قازاقستاندىق دومبىراشىلار دا باق سىناۋدا.

بايقاۋدىڭ قۇرىلتايشىلارى مەن ۇيىمداستىرۋشىلارى - استراحان وبلىسى مادەنيەت جانە تۋريزم مينيسترلىگى، قازاق مادەنيەتىن دامىتۋ قورى، استراحان وبلىستىق «جولداستىق» ۇيىمى، قۇرمانعازى اتىنداعى مادەنيەت ورتالىعى.

اۆتور: ەلجان ەرالى