سينگاپۋردە لي كۋان يۋمەن قوشتاسۋ ءراسىمى باستالدى

استانا. قازاقپارات - بۇگىن سينگاپۋردەگى پارلامەنت عيماراتىندا ەلدىڭ تۇڭعىش پرەمەر-ءمينيسترى لي كۋان يۋمەن قوشتاسۋ شاراسى باستالدى.

www.24.kz -تىڭ سينگاپۋردەگى مەنشىكتى ءتىلشىسى اينۇر بەردىبايدىڭ حابارلاۋىنشا، ناۋرىزدىڭ 25- تاڭعى ۋاقىتتا الەمگە تانىمال ساياساتكەر لي كۋان يۋدىڭ دەنەسىن سينگاپۋر پرەزيدەنتىنىڭ رەسمي رەزيدەنتسياسى يستانادان پارلامەنت عيماراتىنا الىپ كەلگەن.

اتالعان عيماراتتىڭ الدىنا ەلىنە ەڭبەگى سىڭگەن كوشباسشىسىمەن قوشتاسۋ ءۇشىن قابىرعاسى قايىسقان قالا تۇرعىندارى تاڭ اتىسىمەن جينالىپ، كەزەك الدى.

ەكس-پرەمەر مينيسترمەن قوشتاسۋ راسىمىنە كەلگەن ءدۇيىم جۇرت ىشكە ەنگەن سوڭ، سوڭعى ساپارعا اتتانعان باسشىلارىنا باس ءيىپ قۇرمەت كورسەتتى.

ايتا كەتەيىك، سينگاپۋردىڭ نەگىزىن قالاۋشى، 31 جىل بويى ەلدى باسقارعان تۇڭعىش پرەمەر-مينيستر لي كۋان يۋمەن قوشتاسۋ ءراسىمى 25- ناۋرىزدان 28- ناۋرىزعا دەيىن جالعاسادى. جەرلەۋ ءراسىمى ناۋرىزدىڭ 29ىنا جوسپارلانىپ وتىر.

www.24.kz