اقىلدى تۋفليىڭىز بولسا، ءتۇر- ءتۇسىن كۇندە وزگەرتە الاسىز - كەسكىن

استانا. قازاقپارات - ۆيلنيۋستىڭ Ishuu Technologies كومپانياسى ەلەكتروندى سيا (e-ink) تەحنولوگياسى بويىنشا «اقىلدى» تۋفلي تىگىپ شىعارۋ ءۇشىن عالامتورداعى ارنايى سايت ارقىلى قارجى جيناستىرۋدا.

ءبارى ويداعىداي بولسا، جاڭا يننوۆاتسيالىق اياق كيىمنىڭ باعاسى 150 دەن 500 دوللارعا دەيىن تۇراتىن بولادى. تۋفليدىڭ ەلەكتروندى سيا تولتىرىلعان بەتكى جاعىن ونىڭ يەسىنىڭ كوڭىل- كۇيىنە قاراي ۇنەمى وزگەرتىپ وتىرۋعا بولادى.

ال مۇنى ىسكە اسىرۋ ءۇشىن تۋفليدىڭ تابانىنا كىرىكتىرىلگەن ەلەكتروندىق چيپ پەن سمارتفوندى Bluetooth ارقىلى جالعاپ، سوڭعىسىنداعى موبيلدىك قوسىمشا ارقىلى قالاعان ءتۇر-ءتۇستى تاڭدايسىز.

كراۋدفاندينگ -  بەلگىلى ءبىر تاۋار شىعارۋ نەمەسە قىزمەت ءتۇرىن ۇسىنۋدى باستاۋعا ارنالعان كوپ مولشەردەگى قاراجاتتى حالىقتان ەرىكتى تۇردە جيناۋ. قازىرگى ۋاقىتتا ول كوبىنە عالامتور ارقىلى جاسالىپ ءجۇر.

ال «اقىلدى» تۋفلي شىعارۋعا بەل بايلاعان كومپانيا وسى ماقسات ءۇشىن 50 مىڭ ا ق ش دوللارىن جيناستىرۋى ءتيىس.

www.24.kz