بەيجىڭدە ناۋرىز مەيرامى تويلاندى - كەسكىن، فوتو

بەيجىڭ. قازاقپارات - قىتايدا ەكى كۇن بويى ناۋرىز مەرەكەسى ءتورت الاڭدا: ورتالىق ۇلتتار ۋنيۆەرسيتەتىندە، ۇلتتار باسپاسىندا، قىتاي مۇناي ۋنيۆەرسيتەتىندە جانە «تايۋان» ديپلوماتيالىق كومپاۋندىندا اتاپ ءوتىلدى.

21- ناۋرىز كۇنى ورتالىق ۇلتتار ۋنيۆەرسيتەتىنىڭ ستۋدەنتتەرىنىڭ قازاق دياسپوراسىنىڭ وكىلدەرى ناۋرىز مەيرامىنا ورايلاستىرىپ تەاترلاندىرىلعان قويىلىم قويدى.

بەيجىڭدە تۇراتىن زيالى قاۋىم وكىلدەرى ۇلتتار باسپاسىندا مەرەكەلىك داستارحان جايدى. ال قىتاي مۇناي ۋنيۆەرسيتەتىندە وقيتىن قازاق جاستارى كونسەرت قويىپ، سپورتتىق جارىستار ۇيىمداستىردى. ولار سونداي-اق ناۋرىز مەيرامىنىڭ ءداستۇرلى تاعامدارىنان داستارحان جايدى.

«قازى-قارتانى ءبىز ەلگە دەمالىسقا بارعاندا الىپ كەلدىك. قىزدارىمىز ناۋرىز كوجە مەن باۋىرساق ازىرلەدى. ءبىز، شەتەلدە ءبىلىم الىپ جۇرگەن ستۋدەنتتەر سالتىمىزدى ۇمىتپاۋ ءۇشىن مۇنداي مەرەكەلەردى اتاپ ءوتۋدى داستۇرگە اينالدىردىق»، - دەيدى قىتاي مۇناي ۋنيۆەرسيتەتىنىڭ ستۋدەنتى تەمىرلان اسقاروۆ.

ال 22- ناۋرىز كۇنى «تايۋان» ديپلوماتيالىق كومپاۋندىندا قازاقستاندىق ديپلوماتتار مەن ق ح ر- داعى ۇلتتىق كومپانيالاردىڭ وكىلدەرى ناۋرىز مەيرامىن قال-قادىرلەرىنشە اتاپ ءوتتى. توي قوناقتارى ناۋرىز كوجەدەن باسقا باۋىرساق پەن مانتىدەن دە ءدام تاتتى. بالالار اسىق اتىپ، ۇلتتىق ويىندار وينادى.

«ءبىز بارلىق قازاقستاندىقتاردى ناۋرىز مەيرامىمەن قۇتتىقتايمىز! وتانىمىزعا تىنىشتىق پەن ءوسىپ-وركەندەۋ، بارىڭىزگە دەنساۋلىق پەن باقىت تىلەيمىز! مەملەكەت باسشىسىنىڭ كورەگەن ىشكى جانە سىرتقى ساياساتىنىڭ ارقاسىندا قازاقستاندا بەيبىتشىلىك پەن كەلىسىم ۇستەمدىك قۇرۋدا. ءبىزدىڭ كوپ ۇلتتى ەلىمىز ءوز دامۋىندا جاڭا جەتىستىكتەرگە قول جەتكىزە بەرسىن!» - دەدى ش ى ۇ حاتشىلىعى جانىنداعى ق ر- نىڭ تۇراقتى وكىلى، كەڭەسشى- ەلشى باعدات سەيىتباتتالوۆ.