قوستانايدا ۇيلەنۋشى جاستار تويلارىنا نازاربايەۆتى شاقىردى

استانا. قازاقپارات - قوستاناي قالاسىنداعى «سالتانات سارايىندا» ەرەكشە نەكە قيۋ ءراسىمى ءوتتى.

وعان وبلىس اكىمى نۇرالى ءسادۋاقاسوۆ قاتىسىپ، جاس جۇبايلار -  اسەت جانە انار سۇندەتبايەۆتارعا پرەزيدەنتتىڭ قۇتتىقتاۋ حاتىن تابىستادى.

بۇل تۋرالى today.kz حابارلادى.

اسەت بۇعان دەيىن نۇرسۇلتان نازاربايەۆقا حات جازىپ، ءوزىنىڭ ۇيلەنۋ تويىنا شاقىرىپتى.

ول -  تاۋەلسىزدىكتىڭ قۇرداسى. رۋدنىي يندۋستريالدىق ينستيتۋتىن بىتىرگەن. قازىرگى تاڭدا ماگنيتوگورسك مەملەكەتتىك تەحنيكالىق ۋنيۆەرسيتەتىندە «مەتاللۋرگ» ماماندىعى بويىنشا وقىپ جاتىر.

ال جۇبايى انار اتالعان وقۋ ورنىندا قۇرىلىسشى ماماندىعى بويىنشا ءبىلىم الۋدا.

اسەت مەملەكەت باسشىسىن ۇلگى تۇتادى ەكەن. سوندىقتان دا ول مەتاللۋرگ ماماندىعىن تاڭداپتى. ءا. سۇندەتبايەۆ تاۋەكەلگە بەل بايلاپ، پرەزيدەنتكە ۇيلەنۋ تويىنا شاقىرۋ ماقساتىمەن جازعان حاتىنا جاۋاپ كەلگەندە، قۋانىشىندا شەك بولماپتى.

اسەت: «پرەزيدەنتتىڭ قىزمەتىن، ەڭبەك جولىن ۇلگى تۇتامىن. مەملەكەت باسشىسىنىڭ ارقاسىندا جاستار شەتەلدە وقۋدا. مىنا مەن دە جۇبايىم ەكەۋىمىز رەسەيدە ءبىلىم گرانتمەن وقىپ جاتىرمىز. نۇرسۇلتان نازاربايەۆتى ۇيلەنۋ تويىما شاقىرامىن دەپ دوستارىما ايتقانىمدا ولار سەنبەدى. جۇمىسىنىڭ كوپتىگىنە قاراماستان، مەنىڭ حاتىما جاۋاپ بەرگەنىنە ريزامىن، -  دەدى. ال وبلىس اكىمى نۇرالى سادۋاقاسوۆ ەلباسىنىڭ ءوز قولىمەن جازعان قۇتتىقتاۋ حاتىن تابىستادى جانە جاس جۇبايلارعا تەلەديدار سىيلادى. ن. ءسادۋاقاسوۆ: «ۇيلەنۋ تويىندا پرەزيدەنتتىڭ قۇتتىقتاۋ حاتىن الۋ - ۇلكەن مارتەبە. ەلىمىزدە وسىنداي جاس وتاۋلار كوبەيە بەرسىن»، -  دەدى. جولدىباي بازار.