ءاز ناۋرىزدىڭ ەرەكشە سالت-ءداستۇرى ۇيقى اشار مەن سەلت ەتكىزەر
بۇل ەرتە زامانداردان بەرى اق پەن قارانىڭ، جاقسىلىق پەن جاماندىقتىڭ تەڭەسۋىمەن استاستىرىلادى.
سوندىقتان دا بارلىق ەل وسى ءتۇندى ۇيىقتاماي وتىرىپ قارسى الىپ، ارايلاپ اتقان اپپاق تاڭدى، شۋاعىن شاشا بوي كوتەرگەن التىن كۇندى العاشقىلاردىڭ ءبىرى بولىپ كورۋدى جاقسىلىققا جورىعان. كارىلەر تاڭىردەن دۇعا تىلەپ، بوساعا اتتاعان جاڭا جىلدىڭ جايلى، داستارحاننىڭ مايلى بولۋىن، ەل- جۇرتىنىڭ امان، زامانىنىڭ تىنىش بولۋىن سول دۇعا- تىلەكتەرىنە ارقاۋ ەتكەن. ال جاستار جاعى ءتۇنى بويى التىباقان تەۋىپ، اۋىلدىڭ التى اۋىزىن ايتىپ، قىز- جىگىتتەر ءبىر- بىرىمەن ويناپ- كۇلىپ وتكىزگەن. ۇلكەندەرى جوق ۇيگە جينالىپ، باستاڭعى جاساپ، اق داستارقان باسىندا ەمىن- ەركىن قالجىڭداسىپ، ءان- جىر ايتىسىپ، وزدەرىنشە تويلاعان.
وسى ءبىر كوڭىلدى دە كورىكتى تۇندە جاس جىگىتتەر ۇناتقان قىزدارىنا ءسوز سالىپ، بولاشاق جارىن تابۋعا اسىعادى. ال قىزدار جاعى كوڭىل- قوشى اۋعان «سەرىسىنە» ەمەۋرىن ءبىلدىرۋ ءۇشىن، ەڭ ءتاتتى-ءدامدى تاعامىن ازىرلەيدى. مۇنداي ىردۋ-دىردۋ تۇندە ۇيقى تۇگىلى شارشاۋدى دا ويلاماعان جىگىتكە «ۇيقىڭدى اش» دەگەن سىلتاۋمەن «ۇيقىاشار» ۇسىنادى.
ارۋ تاراپىنان كورسەتىلگەن وسىنداي قوشامەتكە جىگىتتىڭ بەي- جاي قالۋى ەكىتالاي. سوندىقتان ولار دا قاراپ قالماي «سەلت ەتكىزەر» دەگەن نيەتپەن الگى ارۋعا اينا-تاراق، القا- سىرعا، شولپى- شاشباۋ سىيلايدى. وسىلايشا، كۇن مەن ءتۇننىڭ تەڭەلگەن شاعىندا جىگىت پەن قىزدىڭ جۇرەكتەرى دە تابىسىپ، بولاشاق ۇلكەن وتباسىن قۇرۋعا العاشقى قادام جاسالادى.
مىنە، ءدال وسىلاي ۇلىستىڭ ۇلى كۇنىنىڭ اجىراماس ءبىر بولىگىندەي ادەمى سالتتارىمىز بەن اسەم داستۇرلەرىمىز قالىپتاستى. قازاق حالقى جاڭا جىلىن قۇدايعا دەگەن شەكسىز ىرزالىقپەن، ولشەۋسىز ۇمىتپەن، كەلەشەككە دەگەن زور ماحابباتپەن قارسى العان. ءاز ناۋرىز وسىنىسىمەن دە ەرەكشە، وسىنىسىمەن دە ومىرشەڭ. ەندىگى جەردە جاستارىمىز ءدال وسى «ۇيقى اشار» مەن «سەلت ەتكىزەردى» قايتا جانداندىرىپ، گازەت پەن سايت بەتتەرىندە ەسكە الاتىنداي ەسكى سالت ەمەس، شىنايى ءومىرىمىزدىڭ شاشاۋى شىقپاعان بولشەگىندەي دەڭگەيگە جەتكىزسە دەگەن ۇمىتپەن بيىلعى ۇلىستىڭ ۇلى كۇنىن قارسى الىپ وتىرمىز! ءاز ناۋرىز قۇتتى بولسىن، اعايىن!
اۆتور: ءابۋ- اسقار مەكەش ۇلى
