قازاقستان پرەزيدەنتى: بارشاعا باقىت، تىنىشتىق جانە بەرەكە تىلەيمىن

استانا. قازاقپارات - قازاقستان پرەزيدەنتى «ناۋرىز - نۇرلى جول» دەپ اتالعان مەرەكەلىك شاراعا قاتىستى، ونىڭ بارىسىندا تەاترلاندىرىلعان مۋزىكالىق قويىلىمدار كورسەتىلدى جانە بەلگىلى قازاقستاندىق ارتىستەر مەن شىعارماشىلىق ۇجىمداردىڭ قاتىسۋىمەن كونسەرت ءوتتى.

بۇل تۋرالى اقوردانىڭ رەسمي سايتىندا حابارلاندى.

ەلوردا تۇرعىندارى مەن قوناقتارى الدىندا ءسوز سويلەگەن نۇرسۇلتان نازاربايەۆ بارشا قازاقستان حالقىن ناۋرىز مەيرامىمەن قۇتتىقتادى.

- بۇل مەرەكە كۇننىڭ العاشقى شۋاقتى جىلۋىمەن بىرگە كەلەدى. كوپتەگەن ەلدەر ناۋرىزدى جاڭا جىل رەتىندە اتاپ وتەدى. بۇل كۇندەرى ادامدار ءبىر-بىرىمەن كەزدەسىپ، وكپە-رەنىشتەرىن كەشىرەدى. ىزگى ىستەر جاساپ، كومەك كورسەتەدى جانە باقىت تىلەيدى، - دەدى قازاقستان پرەزيدەنتى.

مەملەكەت باسشىسى قازاقستاننىڭ تاۋەلسىزدىك جىلدارى ازاماتتارى ماقتان تۇتاتىن قۋاتتى مەملەكەتكە اينالعانىن ايتتى.

 - ءبىز ءبارىمىز بىرگە ەلىمىزدى بۇكىل الەمگە تانىتتىق. قيىندىقتارعا قاراماستان، ءبىزدىڭ حالقىمىز ءاردايىم تۇتاستىعىن ساقتادى جانە العا قاراي سەنىممەن ءجۇرىپ وتىردى. الەمدە داعدارىس كورىنىستەرى بايقالىپ وتىرعان قازىرگى كەزدە دە قازاقستاننىڭ ولاردى ەڭسەرۋگە قاجەتتى رەسۋرستارى جەتكىلىكتى. ءبىزدىڭ ەلىمىز ءوزىنىڭ بۇدان ءارى دامۋىنىڭ جوسپارلارىن، سونىڭ ىشىندە «قازاقستان-2050» ستراتەگياسىن، «نۇرلى جول» باعدارلاماسىن، جاڭا الەۋمەتتىك جانە ينفراقۇرىلىمدىق نىسانداردىڭ جوبالارىن ازىرلەپ، جۇزەگە اسىرۋدا. وسىنىڭ بارىنە حالىقتىڭ بىرلىگى، ءبىر-بىرىنە دەگەن قۇرمەتى مەن سەنىمى، ەلدىڭ تۇراقتىلىعى قاجەت. ەگەر ءبىز تاڭداعان جولىمىزدان اۋىتقىماي جۇرەتىن بولساق، قازاقستاننىڭ بولاشاعى بۇدان دا جارقىن بولادى، - دەدى نۇرسۇلتان نازاربايەۆ.

سوڭىندا قازاقستان پرەزيدەنتى بارشاعا باقىت، تىنىشتىق جانە بەرەكە تىلەدى.

مەرەكەلىك كونسەرتتەن كەيىن مەملەكەت باسشىسى ەتنو اۋىلدى ارالاپ، قالا تۇرعىندارىمەن اڭگىمەلەستى.