بيلىك ەندى انشىلەردى جازالاۋعا كىرىستى

استانا. قازاقپارات - تابىسىنان سالىق تولەمەگەن ارتىستەر ەندى ايىپپۇل ارقالايدى. بۇل تۋرالى الماتى قالالىق كىرىس دەپارتامەنتىنىڭ باسشىلارى حابارلادى.

 

جۇلدىزداردىڭ باسىن قوسىپ، جيىن وتكىزگەن سالىقشىلار ونەر ادامدارىن ءوز ەرىكتەرىمەن كاسىپكەرلىك اشۋعا شاقىردى. سالىقشىلار ونەر جۇلدىزدارىن جيىپ، جەكە كاسىپكەرلىك اشۋعا ۇگىتتەمەك بولعان.

الايدا شاقىرىلعان 400 دەن اسا ءارتىستىڭ نەبارى 30 شاقتىسى عانا كەلدى. دەسە دە، جوسپارلى جۇمىستى جالعاستىرعان ماماندار تابىسىن جاسىرعان ارتىستەر جازاسىز قالمايدى دەپ وتىر.

كىمنىڭ قانشا پايدا تاپقانىن دالەلدەۋ ءۇشىن الداعى ۋاقىتتا تويلار مەن كەشتەرگە رەيد جۇرگىزىپ، فيرماسى جوق ونەر يەلەرىنە دۇرسە قويماق.

«تىركەلمەگەن ارتىستەرگە كەلەتىن بولساق، ولاردىڭ بىزگە اتى-ءجونى، ءبارى بەلگىلى. كەز كەلگەن ءارتىستى تەكسەرۋگە بولادى. تىركەلگەن-تىركەلمەگەنىن كەز كەلگەن ينسپەكتور تەكسەرە الادى. ەگەر ءارتىس كاسىپكەر رەتىندە تىركەلمەگەن بولسا، ولارعا اكىمشىلىك ايىپپۇل سالىنادى»، - دەدى الماتى قالالىق كىرىس دەپارتامەنتىنىڭ ءبولىم باسشىسى ەدىل ءازىمشايىق.

ەگەر ءارتىس كاسىپكەر رەتىندە تىركەلمەگەن بولسا، ولارعا اكىمشىلىك ايىپپۇل سالىنادى

قازىرگى تاڭدا الماتى قالاسى بويىنشا كىرىس دەپارتامەنتىنە 1 مىڭ 29 ونەر ادامى كاسىپكەر رەتىندە تىركەلىپتى. وتكەن جىلى سونىڭ 650 ءى عانا تابىسىنان 45 ميللون تەڭگە سالىق قۇيسا، 35 پايىزى كىرىسكە كوك تيىن دا تولەمەگەن.

وسىنى ءسوز ەتكەن باسشىلار ءاربىر ءارتىس ايىنا «ميللونداپ تابىس تابادى» دەگەننەن جاڭىلماي وتىر.

الايدا، ءان سالىپ، توي جۇرگىزەتىندەر «شىعىنىمىز شاش ەتەكتەن، ايلىق جالاقىمىز ميلليون تۇگىلى، جارتىسىنا دا جەتپەيدى» دەپ زار يلەۋدە.

«جەتكىلىكتى تابىس تاباتىن ارىپتەستەرىممەن قاتار، وتە از تابىس كورەتىندەرى دە بار. مىسالى، ءار تويدان ولار 10 مىڭ تەڭگە تابۋى مۇمكىن. ەگەر ايىنا ءبىر-ەكى توي بولسا، ول سوندا 30-40 مىڭ تەڭگە تابىس تابۋى مۇمكىن»، - دەدى كومپوزيتور ارمان دۇيسەنوۆ.

«سالىقشىلار ءار كەشتەن 10-15 مىڭ تەڭگە الامىز دەگەن اسابالارعا سەنبەيدى. مەن ءوز باسىم 20 مىڭعا توي جۇرگىزەمىن. ارتىق تابىسىڭدى جاسىرعان ءۇشىن ايىپپۇل سالام دەي مە؟ الدىمەن سونداي تابىس تاپقانىمدى دالەلدەسىن»، - دەدى اسابا ەلەنا وپۋحتينا.

سالىقشىلاردىڭ ەسەبىنشە، الماتىدا 3000 نان اسا ونەر جۇلدىزى تۇرادى. ونىڭ ىشىندە تانىمالى دا، شوۋ-بيزنەسكە ەندى قادام اتتاعاندارى دا بار.

سول سەبەپتى قۇزىرلىلار اسابا، ءبيشى، ءتىپتى سايقىمازاقتاردىڭ جەكە كاسىپكەر بولۋىن مىندەتتەپ وتىر.

«الماتى تەلەارناسى»