اتوم ەنەرگياسىن قولدانۋ سالاسىنداعى زاڭنامانى جەتىلدىرۋگە باعىتتالعان دوڭگەلەك ۇستەل ءوتتى

استانا. قازاقپارات - بۇگىن استاناداعى ەۋرازيا ۇلتتىق ۋنيۆەرسيتەتىنىڭ ءپانارالىق عىلىمي-زەرتتەۋ ورتالىعىندا «اتوم ەنەرگياسىن قولدانۋ سالاسىنداعى قازاقستان رەسپۋبليكاسىنىڭ زاڭناماسىن جەتىلدىرۋ» تاقىرىبىندا دوڭگەلەك ۇستەل ءوتتى.

شارانى ق ر پارلامەنتى ءماجىلىسىنىڭ ەكولوگيا ماسەلەلەرى جانە تابيعاتتى پايدالانۋ كوميتەتى مەن ماجىلىستەگى «نۇر وتان» پارتياسى فراكسياسى جانىنداعى ەكونوميكالىق ساياسات جونىندەگى كەڭەس بىرىگىپ ۇيىمداستىردى. بۇل تۋرالى پالاتانىڭ باسپا ءسوز قىزمەتىنەن حابارلاندى.

دوڭگەلەك ۇستەلدىڭ ماقساتى - «اتوم ەنەرگياسىن قولدانۋ تۋرالى» جانە «قازاقستان رەسپۋبليكاسىنىڭ اتوم ەنەرگياسىن قولدانۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى بويىنشا قورىتىندىلاردى دايىنداۋ بارىسىندا وتكىزىلگەن جۇمىس توپتارىندا پايدا بولعان سۇراقتاردى تالقىلاۋ بولدى.

ەكولوگيا ماسەلەلەرى جانە تابيعاتتى پايدالانۋ كوميتەتىنىڭ ءتوراعاسى الەكساندر ميليۋتيننىڭ باسشىلىعىمەن دوڭگەلەك ۇستەلگە قاتىسۋشىلار اۋىر يونداردى جەدەلدەتكىش جۇمىسىمەن تانىسىپ، بۇل ۇلگىنىڭ زاماناۋي ەكولوگيالىق تازا جانە رادياتسيالىق قاتەرى تومەن قوندىرعى ەكەنىنە نازار اۋداردى.

ايتا كەتەتىنى، بۇگىنگى كۇنى ءماجىلىستىڭ قاراۋىندا جاتقان جاڭا رەداكسياداعى زاڭ جوباسى يادرولىق، رادياتسيالىق جانە ەلەكتر فيزيكالىق قوندىرعىلاردى ورنالاستىرۋ، سالۋ، پايدالانۋ جانە پايدالانۋدان شىعارۋ كەزىندە قاۋىپسىزدىكتىڭ قاعيداتتارى مەن نەگىزگى تالاپتارىن ايقىن بەلگىلەۋگە باعىتتالعان. زاڭ جوباسىندا قاۋىپسىزدىك تالاپتارىنىڭ اراجىگىن اجىراتۋ ءۇشىن قوندىرعىلار مەن يونداۋشى ساۋلە كوزدەرىنىڭ رادياتسيالىق قاۋىپتىلىك ساناتى بەلگىلەنگەن. سونداي-اق اتوم ەنەرگياسىن پايدالانۋ سالاسىندا قىزمەتىن جۇزەگە اسىراتىن كاسىپورىندار ءۇشىن تالاپتار، يونداۋشى ساۋلە كوزدەرىن ەسەپكە الۋ مەن باقىلاۋ تالاپتارى، پەرسونالدى، حالىقتى جانە قورشاعان ورتانى قورعاۋ تالاپتارى، پەرسونالدى دايارلاۋ دەڭگەيىنە قويىلاتىن تالاپتار ايقىندالعان.

جالپى، زاڭ جوباسىن قابىلداۋ زاڭنامالىق بازانى ودان ءارى جەتىلدىرۋگە جانە اتوم ەنەرگياسىن پايدالانۋمەن بايلانىستى قىزمەتتى جۇزەگە اسىرۋ كەزىندە قوعامدىق قاتىناستاردى قۇقىقتىق رەتتەۋدەگى ولقىلىقتاردى جويۋعا، اتوم ەنەرگياسىن پايدالانۋ سالاسىنداعى جۇمىستاردى حالىقارالىق ستاندارتتار دەڭگەيىندە ورىنداۋ كەزىندە قاۋىپسىزدىك تالاپتارىن بەلگىلەۋگە جانە ۇيلەستىرۋگە الىپ كەلەدى.

اۆتور: قانات مامەتقازى ۇلى