بولگاريادا قازاق ءتىلى جانە قازاقستان تاريحى مەن مادەنيەتىن زەردەلەۋ ورتالىعى اشىلدى
بۇل تۋرالى ق ر س ءى م باسپا ءسوز قىزمەتى حابارلادى.
ءىس-شارا شەڭبەرىندە قازاقستاننىڭ بولگارياداعى ديپلوماتيالىق ميسسياسىنىڭ باسشىسى تەمىرتاي ءىزباستين جانە سوفيا ۋنيۆەرسيتەتىنىڭ رەكتورى ي. يلچيەۆ قازاقستاننىڭ بولگارياداعى ديپلوماتيالىق ميسسياسى جانە سوفيا ۋنيۆەرسيتەتى اراسىنداعى ءوزارا تۇسىنىستىك تۋرالى مەموراندۋمعا قول قويدى. مەموراندۋم قازاق جانە بولگار تاراپتارىنا مادەنيەت، عىلىم جانە ءبىلىم بەرۋ سالاسىنداعى ىنتىماقتاستىقتى ودان ءارى دامىتۋعا مۇمكىندىك بەرەدى.
«قازاق ءتىلى» ءپانىن وقىتۋدى ەۋروپادا العاش رەت بولگار تۇرىكتانۋشىسى ەميل بويەۆ سوفيا ۋنيۆەرسيتەتىنىڭ اكادەميالىق باعدارلاماسىنا ەنگىزگەن. بۇگىنگى تاڭدا قازاقستاننىڭ بولگارياداعى ديپلوماتيالىق ميسسياسى مەن قۇرمەتتى كونسۋلدىگىنىڭ كۇش-جىگەرلەرىنىڭ ارقاسىندا، سوفيا ۋنيۆەرسيتەتىنىڭ قولداۋىمەن، قازاق ءتىلى ورتالىعى جوندەلىپ، قازاق ءتىلىن ۇيرەنەتىن ستۋدەنتتەر ءۇشىن زاماناۋي جابدىقپەن جانە و ق ۇ قۇرالدارىمەن قامسىزداندىرىلدى.
ءىس-شارا قوناقتارى ىشىندە قازاقستان ازاماتتارى جانە دياسپورا وكىلدەرى، شەت مەملەكەتتەر ديپلوماتيالىق وكىلدىكتەرىنىڭ باسشىلارى، دەپۋتاتتار، بولگاريانىڭ باسپا ءسوز، اكادەميالىق جانە قوعامدىق ورتالارىنىڭ وكىلدەرى بولدى.
