الماتى كاسىپكەرلەرىنە ءساۋىر ايىنان باستاپ جەڭىلدەتىلگەن نەسيە بەرىلەدى

الماتى. قازاقپارات - «دامۋ» كاسىپكەرلىكتى دامىتۋ قورى مەن الماتى قالاسىنىڭ اكىمدىگى جەكە كاسىپكەرلىك سۋبەكتىلەرىن قارجىلاندىرۋعا ارنالعان «جىبەك جولى» ايماقتىق باعدارلامانى جۇزەگە اسىرۋ تۋرالى كەلىسىمگە قول قويدى.

ەندى الماتى قالاسىنىڭ ساۋدا جانە قىزمەت كورسەتۋ سالاسىنداعى كاسىپكەرلەرى جاڭا ءارى جەڭىلدەتىلگەن نەسيەگە قول جەتكىزە الادى.

كەلىسىلگەن ۋاعدالاستىققا ساي، ساۋدا مەن قىزمەت كورسەتۋ سالالارىنداعى جانە سونداي-اق، «بيزنەستىڭ جول كارتاسى-2020» باعدارلاماسىنا كىرمەي قالعان سالالارداعى كاسىپكەرلەرگە قارجىلاي كومەك بەرىلەدى.

وسى باعىتتا 4 ميلليارد تەڭگە كولەمىندە قارجى بولىنبەك. قارجىنىڭ 50 پايىزىن اكىمدىك ءوز بيۋدجەتىنەن جۇمساسا، قالعان 50 پايىزىن «دامۋ» قورى ءوز ەسەبىنەن تولتىرادى.

قارجى كاسىپكەرلەرگە ە د ب ارقىلى ءساۋىر ايىنان باستاپ بەرىلە باستايدى.

«باعدارلاما الماتى كاسىپكەرلەرىن ارزان ءارى قولجەتىمدى نەسيەلەرمەن قامتاماسىز ەتۋ، جۇمىس ورىندارىن ساقتاپ قالۋ جانە جاڭا ورىنداردى اشۋ جانە بيۋجەتكە تۇسەتىن سالىمداردىڭ كولەمىن ۇلعايتۋ ماقساتىندا قابىلداندى. ساۋدا جانە قىزمەت كورسەتۋ سالاسىنداعى كاسىپكەرلەر «ب ج ك-2020» باعدارلاماسىنان تىس قالعانى بەلگىلى. وسى سالالاردىڭ ا ءى و- دەگى ۇلەسى 63 پايىز، بيۋدجەتتىك تۇسىمدەگى ۇلەسى 66 پايىز ەكەندىگىن ەسكەرسەك، (2014-جىلى 685 ميلليارد تەڭگە ءتۇستى) بۇل كاسىپكەرلەر قولداۋعا ءزارۋ. الماتىدا اتالعان سالادا 170301 كاسىپورىن جۇمىس ىستەپ تۇر. ولاردا 454 مىڭ ادام جۇمىس ىستەۋدە»، - دەدى قالالىق كاسىپكەرلىك، يندۋستريالدىق-يننوۆاتسيالىق دامۋ جانە اۋىل شارۋاشىلىعى باسقارماسىنىڭ باسشىسى ءالفيا بالوۆا.

كەلىسىمگە سايكەس، ءبىر كاسىپكەرگە 180 ميلليون تەڭگەگە دەيىن جىلدىق %7 عا دەيىنگى ۇستەمەمەن نەسيە بەرىلەدى.

ازىرگە الماتىلىق كاسىپكەرلەردى قارجىلاندىرۋعا ءتورت بانك «سەسنا بانك» ا ق، «الفا بانك» ا ق، «ەۋرازيا بانكى» ا ق جانە «رەسەي سبەربانك» ا ق ىنتا ءبىلدىردى.

«دامۋ» قورىنىڭ وكىلدەرى نەسيەنى پايدالانۋ ماقساتىنا دا شەكتەۋ قويىلمايتىنىن جەتكىزدى.

«كاسىپكەر نەسيەنى تەك قانا ينۆەستيتسيالىق ماقساتتا عانا ەمەس، اينالىم قارجىسىن تولىقتىرۋعا دا الا الادى. ەگەر، جاسى 29 عا جەتپەگەن جاس كاسىپكەر بولسا، وعان «دامۋ» قورى كەپىلدىك كومەك كورسەتە الادى»، - دەدى «دامۋ» كاسىپكەرلىكتى قولداۋ قورى ا ق ءتورايىمىنىڭ ورىنباسارى ميراس بەيسەمبايەۆ.

اۆتور: گۇلميرا عوسمانالي