نيۋ-يوركتە ناۋرىز مەيرامى تويلاندى
تۇركى ەلدەرىنىڭ وكىلدەرى مەن «قازاق-امەريكا اليانسى» ۇيىمىنىڭ وكىلدەرى ۇلتتىق ءداستۇر اسپەتتەلگەن مادەني باعدارلاما ۇسىندى. مەرەكەلىك شاراعا قاتىسقان برۋكلين ءمەرى ناۋرىز مەيرامى جىلدا وتكىزىلەتىنىن جەتكىزدى، دەپ اقپارات تاراتتى 24.kz.
سان ءتۇرلى ۇلتتىق مادەني جانە سالت-ءداستۇر كورىنىستەرى ۇشتاسقان قويىلىم برۋكليننىڭ رەسمي اكىمشىلىك عيماراتىندا العاش ءوتىپ وتىر. تۇركىتىلدەس ەلدەر فەستيۆالىنىڭ اشىلۋىنا قاتىسقان برۋكلين ءمەرى ەريك ادامس جۇرتشىلىقتى كۇن مەن ءتۇن تەڭەسكەن ناۋرىز مەرەكەسىمەن قۇتتىقتادى. سونداي-اق برۋكلين تۇرعىندارىنىڭ %47 ىن قۇرايتىن وزگە ۇلت وكىلدەرى ادەت-عۇرپىن، انا تىلدەرىن ساقتاۋعا مۇمكىندىك جاسالعانىن جەتكىزدى. وسىدان 5 جىل بۇرىن ب ۇ ۇ باس اسسامبلەياسىنىڭ شەشىمىمەن مولشىلىق پەن دوستىقتى پاش ەتەتىن ناۋرىز مەيرامى حالىقارالىق مەرەكە بولىپ جاريالانعان بولاتىن.
«ونداعان ۇلتتى ورتاق مەرەكە اياسىندا بىرىكتىرگەن ناۋرىز مەيرامىنىڭ ءمان-ماڭىزىنىڭ جوعارى ەكەندىگىنە كوز جەتكىزدىم. بىرلىككە ۇندەيتىن بۇل مەرەكەدەن سىزدەردىڭ باي مادەني مۇرالارىڭىزعا قانىقتىم. برۋكلين قازاق دياسپوراسىنىڭ ەڭ كوپ شوعىرلانعان مەكەنى بولىپ سانالادى. ءبىز العاش رەت ناۋرىزدى تويلاپ وتىرمىز. ەندى ءداستۇرلى تۇردە اتاپ وتىلەتىن بولادى»، - دەدى برۋكلين ءمەرى ەريك ادامس.
مەرەكەلىك كونتەرتتە قازاق، تۇرىك، ازەربايجان، تۇرىكمەن، وزبەك، قىرعىز اندەرى شىرقالدى. اسىرەسە ءبي ۇجىمدارىنىڭ ونەرى كوپشىلىكتى تاڭقالدىردى. سىزىلتىپ ءان سالعان التىناي ساپارعاليەۆا كورەرمەندەر كوڭىلىنەن شىقتى.
«ءبىزدىڭ ۇيىم كوممەرتسيالىق ەمەس. ءبىراق نيۋ-يوركتە جۇزدەگەن شارانىڭ وتۋىنە ۇيىتقى بولدىق. سۋرەتشىلەر كورمەسى، كونسەرتتىك باعدارلامالار جانە مادەني-كوپشىلىك شارالار وتكىزدىك. وسىلايشا ءبىز امەريكا حالقىنا ۇلتتىق ونەرىمىزدى تانىتۋدامىز. ويتكەنى ءاربىر جۇرەككە تەك مەيىرىم مەن مادەنيەت ارقىلى جول تابۋعا بولادى. ءبىز ءوز وتانىمىزبەن ماقتانامىز»، - دەدى «قازاق-امەريكا اليانسىنىڭ» پرەزيدەنتى قارلىعاش سارسەكەيەۆا.
برۋكلين اكىمشىلىك عيماراتىنىڭ قابىلداۋ بولمەسى ءبىر كۇنگە تۇركى ەلدەرى حالىقتارىنىڭ اسحاناسىنا اينالدى. ونىڭ ىشىندە قازاقتىڭ ۇلتتىق تاعامدارى ەرەكشە ورىن الادى.
