پاۆلودارلىقتار قىمىزدى ەۋروپا ەلدەرى نارىعىنا شىعارعالى جاتىر - فوتو
2014-جىلى اتالعان شارۋا قوجالىعىنا مەملەكەتتىك قولداۋ اياسىندا «دامۋ» كاسىپكەرلىكتى دامىتۋ قورى» ا ق ارقىلى قىمىزدى اۆتوماتتى قۇيۋ سەحى جوباسى قۇرىلىسىن قارجىلاندىرۋعا 66 ميلليون تەڭگە ءبولىندى.
جاڭا سەحتىڭ اشىلۋىنا وبلىس اكىمى قانات بوزىمبايەۆ قاتىستى.
- بۇل كاسىپورىن قىسقا ۋاقىت ىشىندە قىمىز ءوندىرىسىن دامىتىپ، نارىقتان ءوز ورنىن تاپتى. «ساعىپ» شارۋا قوجالىعىنىڭ قىمىزى تۇتىنۋشىلار تاراپىنان جوعارى باعاسىن الدى، ۇزدىك ءونىم رەتىندە تانىلدى، - دەدى وبلىس اكىمى.
قازىرگى تاڭدا «ساعىپ» ش ق قۇتىعا قۇيىلعان قىمىز ءوندىرىسىن دامىتۋ جولىندا. قىمىزدى ارنايى قۇتىعا قۇيىپ ساتىپ ىسكە اسىرۋ جۇمىسىن 2011-جىلى باستالعان. سول جىلدا بۇل جوبا «بيزنەستىڭ جول كارتاسى-2020» باعدارلاماسى اياسىندا قولداۋ تاپتى.
«ساعىپ» فەرماسىندا مول تاجىريبەسى بار 26 جۇمىسشى ەڭبەك ەتۋدە. قىمىزدى اۆتوماتتى قۇيۋ سەحى قاجەتتى جابدىقتارمەن تولىق قامتىلعان. سەح قىمىز قۇياتىن قۇتىلاردى دا جاساپ شىعارادى. قىمىز قۇيۋ تەحنولوگياسى اۆتوماتتاندىرىلعان، بارلىق جابدىقتار زاماناۋي تەحنولوگيا بويىنشا جۇمىس جاسايدى.
قىمىز سەحى تاۋلىگىنە 5 توننادان اسا قىمىز وندىرەدى. ۇلتتىق سۋسىن 0,3, 0,5 جانە 1,0 ليترلىك شىنى قۇتىلارعا قۇيىلادى. 2015-جىلدىڭ قاڭتارى مەن اقپانى ارالىعىندا 42 توننادان اسا قىمىز ساتىلىمعا شىعارىلدى.
«ساعىپ» ش ق ءوز ونىمدەرىن ءتۇرلى كورمەلەر مەن جارمەڭكەلەردە ۇسىنىپ كەلەدى. ش ق ءونىمى قازاقستان اگرو ونەركاسىپ كەشەنىنىڭ تابىستارى اتاۋىمەن ۇيىمداستىرىلعان «قارا وتكەل جارمەنكەسى-2012» جارمەڭكە-بايقاۋىنىڭ جەڭىمپازى اتاندى. سونىمەن قاتار، وتكەن جىلى «ساعىپ» ش ق ماسكەۋدە وتكەن قازاقستاندىق تاۋارلار مەن ونىمدەر كورمەسىنە دە قاتىستى. وسى كورمە قورىتىندىسى بويىنشا رەسەي فەدەراتسياسى نارىعىنا قىمىزدى ساتىپ ىسكە اسىرۋ بويىنشا مەموراندۋمعا قول قويىلدى.
قىمىز سەحىندا ۇلتتىق سۋسىنمەن بىرگە قازى، شۇجىق، قۇرت، قوسپا، سۇزبە، قايماق وندىرىلەدى. فەرما اۋماعىندا مال سويۋ الاڭى بار. سەح ماماندارى ەت پەن ءسۇت ونىمدەرىنەن قازاقتىڭ ۇلتتىق داستارحانى تاعامدارىن دا ازىرلەيدى.
كاسىپكەر-ايەل تولەۋ قۇشمانوۆا الداعى بولاشاقتا ۇلتتىق سۋسىندى ت م د جانە ەۋروپا ەلدەرى نارىعىنا شىعارۋدى جوسپارلاپ وتىر.
