جۋرناليستىڭ اۋزىن جەلىمدەپ تاستادى

استانا. قازاقپارات - پولشا پرەزيدەنتى برونيسلاۆ كوموروۆسكيدىڭ كۇزەتشىلەرى جۋرناليستى ەدەنگە جاتقىزىپ، اۋزىن جەلىممەن جاۋىپ تاستادى.

وقيعا مەملەكەت باسشىسىنىڭ جەشۋۆ قالاسىنا جاساعان ءىس-ساپارى كەزىندە بولدى، - دەپ جازادى Lenta.ru Dziennik باسىلىمىنا سىلتەمە جاساپ.

جەشۋۆكە ءىس-ساپارى كەزىندە كوموروۆسكي قالاداعى 21- تاۋ اتقىشتارى بريگاداسىندا، سونىمەن قاتار، يننوۆاتسيالارعا جاردەمدەسۋ جونىندەگى زاڭعا پەرزيدەنت قول قويعان جەرگىلىكتى ۋنيۆەرسيتەتتە بولعان. پولشا پرەزيدەنتى شىعۋعا بەتتەگەن كەزدە وعان جۋرناليست كەلىپ سۇراق قويۋعا تىرىسادى.

پرەزيدەنت كۇزەتشىلەرى كەنەتتەن «جۋرناليستىڭ قولىن قايىرىپ، ەدەنگە جاتقىزادى. بولعان وقيعانى «پولياك راديوسىنىڭ» جەشۋۆ قالاسىنداعى فيليالىنىڭ رەپورتەرى كامەراعا ءتۇسىرىپ الىپ، عالامتورعا جۇكتەگەن. ۆيدەودا كۇزەتشىلەردىڭ رەپورتەردىڭ اۋزىن سكوچپەن جاۋىپ تاستاعانى انىق بايقالادى.

پرەزيدەنتتىڭ باسپا ءسوز قىزمەتى بارلىق ايىپتاۋدى جوققا شىعارىپ وتىر. باسپا ءسوز قىزمەتىنىڭ تۇسىندىرۋىنشە، ينتەرنەت قولدانۋشىلارى كۇزەتشىلەردىڭ الاقانىن سكوتچ دەپ ويلاعان. ال جۋرناليستىڭ ۇستالۋ سەبەبى - ونىڭ ءتيىستى قۇجاتى دا، اككرەديتاتسيالاۋ قاعازى دا بولماعان، قاۋىپسىزدىك قىزمەتى سول سەبەپتى ونى پرەزيدەنتكە شابۋىل جاسايدى دەپ قاۋىپتەنگەن.

kaz.tengrinews.kz