الماتىدا يسلام مادەنيەتىنە ارنالعان كورمە اشىلدى
كورمەنى ۇيىمداستىرۋشىلاردىڭ ايتۋىنشا، شارانىڭ ماقساتى - قالىڭ جۇرتشىلىقتى ق ر مەملەكەتتىك ورتالىق مۋزەيى قورىنداعى ەكسپوناتتاردىڭ نەگىزىندە يسلامنىڭ ەرەكشەلىكتەرىمەن تانىستىرۋ.
بۇگىنگى كۇنى مۋزەيدە ساقتالىپ وتىرعان يسلام مادەنيەتىنە قاتىستى قۇندىلىقتاردىڭ نەگىزگى بولىگىن اراب، پارسى، تۇرىك، شاعاتاي، تاتار، وزبەك، قازاق تىلدەرىندەگى سيرەك كەزدەسەتىن قولجازبالار مەن بىرەگەي باسىلىمدار قۇرايدى» - دەدى كورمەنىڭ اشىلۋ راسىمىندە ق ر مەملەكەتتىك ورتالىق مۋزەيى ديرەكتورىنىڭ ءبىرىنشى ورىنباسارى بەيبىتقالي قاقابايەۆ.
سونىمەن قاتار، كورمەگە وسى جازبا ەسكەرتكىشتەرمەن قاتار، ورتا ازيا مەن قازاقستان اۋماعىندا ورتاعاسىرلاردا بيلىك قۇرعان قاراحان، جوشى، شاعاتاي، تەمىر اۋلەتتەرىنىڭ جانە وسمان يمپەرياسى، ەلحان، قىرىم، بۇحار، قوقاند حاندىقتارىنىڭ، مىسىر، اۋعانستان ەلدەرىنىڭ كۇمىس، مىس مونەتالارى دا قويىلعان.
ولاردان باسقا ءداستۇرلى قازاقى ورتادا كەڭىنەن قولدانىلعان كەستەلەنگەن جايناماز، تاسپيىق، وقۋ قۇرالى رەتىندە پايدالانىلعان جىلقىنىڭ جاۋىرىن سۇيەگىنە جازىلعان ءالىپبي، الۋان ءتۇرلى ءدىني مازمۇندى ماتىندەرمەن ورنەكتەلگەن اعاش قالىپتار، ىدىس-اياق سياقتى بۇيىمدار دا كورمە تورىنەن ورىن العان.
سونداي-اق، كورمەدەن ونىڭ تاقىرىپتىق مازمۇنىن اشا تۇسەتىن ءتۇپ نۇسقا فوتوسۋرەتتەر، قوسىمشا يلليۋستراتسيالار، تۇركيا، مىسىر اراب رەسپۋبليكاسى جانە يران يسلام رەسپۋبليكاسى مادەني ورتالىقتارىنىڭ مۇسىلمان قۇسنيحاتىمەن كوركەمدەلگەن جادىگەرلەرىن دە كورۋگە بولادى.
اۆتور: جاپپاربەرگەن ايبوتا