الماتىداعى «نۇر-مۇباراك» ۋنيۆەرسيتەتىندە يسلام ەكونوميكاسى فاكۋلتەتى اشىلادى
بۇل تۋرالى بۇگىن الماتىدا «عىلىم ورداسى» ر م ك كەشەنىندە «قازاقستان-مىسىر ىنتىماقتاستىعى: بۇگىنى مەن كەلەشەگى» اتتى حالىقارالىق عىلىمي كونفەرەنتسيا بارىسىندا اتالمىش ۋنيۆەرسيتەتتىڭ رەكتورى، پروفەسسور، دوكتور جۋدا ابدۋلعاني باسيۋني مالىمدەدى.
ونىڭ ايتۋىنشا، قازىر بۇل ماسەلە ق ر ءبىلىم جانە عىلىم مينيسترلىگىندە تالقىلانۋدا.
«نۇر-مۇباراك» ۋنيۆەرسيتەتى - يسلامنىڭ ورتالىق ازياداعى عىلىمي مۇناراسى ىسپەتتەس. ءبىزدىڭ باستى ماقساتىمىز - يسلامنىڭ شىنايى سارا جولىن قازاق قوعامىنا جەتكىزۋ. قازىر ۋنيۆەرسيتەتتە ءۇش فاكۋلتەت جۇمىس ىستەيدى. ولار - ءدىن تانۋ، يسلام تانۋ جانە شەتەل فيلولوگياسى فاكۋلتەتتەرى. ال ەندى، قۇداي قالاسا، الداعى جىلدان باستاپ، يسلام ەكونوميكاسى فاكۋلتەتىن اشۋدى كوزدەپ وتىرمىز. وسى جاڭا باعىت بويىنشا ماماندار دايارلاناتىن بولادى. قازىر بۇل ماسەلە مينيسترلىك دەڭگەيىندە تالقىلانىپ، ناقتىلانا تۇسۋدە»، - دەدى جۋدا ابدۋلعاني باسيۋني.
ايتا كەتەلىك، بۇگىنگى كونفەرەنتسيا بارىسىندا ەكىجاقتى ديپلوماتيالىق قارىم-قاتىناستىڭ وزەكتى ماسەلەلەرى مەن جەتىستىكتەرى، حالىقارالىق ساياساتتاعى ەكى ەلدىڭ ءوزارا ارەكەتتەستىگى جانە كونەدەن قالىپتاسقان تاريحي-مادەني بايلانىستارى عىلىمي تۇرعىدا جان-جاقتى تالقىلاندى.
اۆتور: جاپپاربەرگەن ايبوتا
