ءسابيت دوسانوۆ ماسكەۋدەن ءتورت ماراپات الىپ قايتتى

None
None
استانا. قازاقپارات - رەسەي فەدەراتسياسىنىڭ بەيبىتشىلىك جانە كەلىسىم سارايىنىڭ كونفەرەنتس- زالىندا مەملەكەتتىك سىيلىقتىڭ لاۋرەاتى، م. شولوحوۆ اتىنداعى حالىقارالىق سىيلىقتىڭ يەگەرى ءسابيت دوسانوۆتىڭ 75 جاسقا تولۋىنا وراي جازۋشىنىڭ شىعارماشىلىق كەشى ءوتتى.

بۇل تۋرالى «ايقىن» رەسپۋبليكالىق گازەتىنىڭ بۇگىنگى سانىندا جازىلدى.

رەسەي جازۋشىلار وداعى مەن «مۇراگەر» جانە «قازاق ءتىلى» قوعامدىق ۇيىمدارى ۇيىمداستىرعان كەشتە ورىستىڭ كورنەكتى اقىنى، رەسەي جازۋشىلار وداعىنىڭ ءبىرىنشى حاتشىسى گەننادي يۆانوۆ، الەم تانىعان سىنشى، اكادەميك فەليكس كۋزنەتسوۆ، تاجىكستاننىڭ حالىق جازۋشىسى شاۆقات نيازي، كورنەكتى مەملەكەت جانە قوعام قايراتكەرى گەنەرال- لەيتەنانت سەرگەي سوكولوۆ، «موسكوۆسكي ليتەراتور» گازەتىنىڭ باس رەداكتورى يۆان گولۋبنيچي، تاريحشى، ادەبيەتشى ۆالەنتين وسيپوۆ ءوز سوزدەرىندە ءسابيت دوسانوۆتىڭ الەم ادەبيەتىنىڭ التىن قورىنا قوسىلعان «اق ارۋانا» پوۆەسى، «ەكىنشى ءومىر»، «تاۋ جولى» روماندارى جايلى پاراساتتى پايىمداۋلارىن ورتاعا سالىپ، جازۋشىنىڭ قۋاتتى، قايتالانباس حاس تالانتىنا اسا جوعارى باعا بەردى.

قازاقستاننىڭ رەسەيدەگى توتەنشە جانە وكىلەتتى ەلشىسى مارات ءتاجيننىڭ قۇتتىقتاۋ حاتىن ەلشىلىكتىڭ جاۋاپتى قىزمەتكەرى ۆيكتور تەمىربايەۆ تابىستادى. جازۋشىنى مەرەيتويىمەن قۇتتىقتاعان قازاق جانە قىرعىز دياسپوراسىنىڭ وكىلدەرى ءسابيت دوسانوۆتىڭ تالانتىنا تاعزىم ەتىپ، شاپان جاپتى.

مەرەيتوي كەشىن جۇرگىزگەن بەلگىلى جازۋشى، رەسەي باسپا ءسوز كلۋبىنىڭ پرەزيدەنتى ۆالەري پوۆوليايەۆ ءسابيت دوسانوۆقا سەرگەي ەسەنين اتىنداعى «زولوتايا وسەن» سىيلىعى بەرىلگەنىن جانە ۆاسيلي شۋكشين التىن مەدالىمەن ماراپاتتالعانى جايلى قۋانىشتى حاباردى جەتكىزگەندە، زال تولى حالىق دۋىلداتا قول سوقتى.

بۇل سىيلىقتاردى رەسەي جانە ماسكەۋ جازۋشىلار وداقتارىنىڭ باسشىلارى تابىستادى. ءسابيت دوسانوۆ سونىمەن بىرگە اسا كورنەكتى مەملەكەت قايراتكەرى گەننادي زيۋگانوۆتىڭ شەشىمىمەن «تىڭ جەرلەردى يگەرۋدىڭ 60 جىلدىعى» جانە پانفيلوۆشى ەسكەرتكىش مەدالىمەن ماراپاتتالدى. ءسويتىپ، قازاق قالامگەرى ماسكەۋدەن ءتورت بىردەي ماراپات الىپ، ەلگە زور ابىرويمەن ورالدى.

 ءسابيت دوسانوۆتىڭ ماسكەۋدە وتكەن شىعارماشىلىق كەشىنە گەنەرال- پولكوۆنيك، رەسەي جازۋشىلار وداعىنىڭ مۇشەسى يۋري ەفيموۆ، اسا كورنەكتى اقىن لەونيد موناستىرسكي، بەلگىلى ارميان ادەبيەتشىسى ستانيسلاۆ وگانيان، درۋجبا نارودوۆ ۋنيۆەرسيتەتىنىڭ پرورەكتورى، پروفەسسور نۇر قيرابايەۆ، «موسكوۆسكي ليتەراتور» گازەتىنىڭ باس رەداكتورى يۆان گولۋبنيچي، رەسەي مەن قازاقستان جانە قىرعىزستاننىڭ ەلگە تانىمال كورنەكتى تۇلعالارى قاتىناستى.

سوڭعى جاڭالىقتار