مەكتەپتەگى ماحاببات

None
None
استانا. قازاقپارات - ءبارىمىز بىلەتىندەي ماحاببات جاسقا قارامايدى. اسىرەسە وتپەلى كەزەڭدەگى ماحاببات. ءدال وسى كەزەڭدە ۇل بالالار مەن قىز بالالار العاشقى عاشىقتىق سەزىمىن باسىنان وتكەرەدى.

بۇل ومىرلىك سىناقتاردىڭ ءبىرى دەسەك تە جاڭىلمايمىز. ال بۇعان اتا- انالار مەن ۇستازداردىڭ كوزقاراسى قانداي؟

ءبىر قىزىعى جاسى ۇلكەن اعا- اپكەلەرىمىز بىزدەردى العاشقى ماحابباتتىڭ، ياعني مەكتەپتەگى ماحابباتتىڭ جالعان ەكەنىنە سەندىرەدى. ونىڭ بار بولعانى باسىمىزدان ءوتۋى ءتيىس عاشىقتىق سەزىمى ەكەنىن ايتادى. ولار مەكتەپ قابىرعاسىندا شىنايى ماحابباتقا ورىن جوق دەپ ويلايدى. ارينە بارلىعى ەمەس. العاشقى پىكىردى جاقتاۋشىلار مەكتەپتە ارمان، قيال سىندى دۇنيەلەردى شەتكە ىسىرىپ، وقۋ كەرەكتىگىن مەڭزەيدى. مۇنىمەن قاتار، مەكتەپ جاسىنداعى عاشىقتار ءبىر- بىرىمەن رەنجىسكەن كەزدە وزدەرىنە قول جۇمساۋى مۇمكىن.

پسيحولوگ ماماندار قاي جاستاعى وقۋشى بولسىن ونىڭ سوزىنە سەنۋگە، ونى تۇلعا رەتىندە قابىلداۋعا كەڭەس بەرەدى. سەبەبى، ءۇشىنشى سىنىپتىڭ بالاسىنىڭ ءوزى قىز جىبەك پەن تولەگەن، رومەو مەن دجۋلەتتا سىندى عاشىقتاردىڭ ەسىمىن ءبىلىپ، ءوز ماحابباتى ءۇشىن كۇرەسۋگە دايىن تۇرادى. بالاعا تىيىم سالعان سايىن ەرەگىسە تۇسەتىنى تاعى بار.

اتا- انامىز ءومىر سۇرگەن زامان وزگەشە بولاتىن. ولار ءۇشىن ماحاببات قۇدىرەتتى كۇشتى سەزىم دەپ تانىلاتىن. ءازىر دە بۇل سەزىمنىڭ باعالى ەكەنى راس. الايدا پسيحولوگ مامانداردىڭ ايتۋىنشا، 13-14 جاستاعى بالا «عاشىق بولىپ كورمەدىم» دەپ ايتۋعا ۇيالادى ەكەن. ياعني بۇگىنگى تاڭدا ەرتە ەسەيۋ قۇبىلىسى بايقالادى.

مەكتەپتە تۇتانعان عاشىقتىق وتى ۇلكەن ومىرگە قادام باسقاندا دا ۇلاسسا جاقسى. ەگەر ءبىر ساتتىك الدامشى سەزىم بولسا، ونىڭ كەرى اسەرىنەن وزگە بەرەرى جوق. بىرىنشىدەن، سۋيتسيدكە اكەلىپ سوقتىرۋى مۇمكىن. ادەتتە وقۋشى ءوز- وزىنە قول جۇمساۋ ارەكەتى ارقىلى اينالاسىنداعىلاردى وزىنە قاراتۋدى مۇرات تۇتادى. الايدا وسى ارەكەتى ارقىلى شىن مانىندە ءولىپ كەتۋى مۇمكىن ەكەنىن تۇسىنبەيدى. ماحاببات سەزىمىن باستان العاش رەت كەشىرىپ وتىرعاندىقتان، قيىن سيتۋاتسيادا قالاي ارەكەت جاساۋ كەرەكتىگىن بىلمەيتىنى تاعى بار.

ەكىنشىدەن، ساباق ۇلگەرىمى ناشارلايدى. ادام ومىرىندە شاڭىراق كوتەرىپ، تۇراقتى وتباسىمەن قامتاماسىز ەتۋدەن اسقان باقىت جوق. سۇيگەن جار مەن قۇرساقتاعى بالانى ەشكىم دە، ەش نارسە دە الماستىرا المايدى. ءبىراق بالا كۇنىمىزدە ميىمىزدىڭ اقپاراتتى قابىلداپ، جىلدام وڭدەيتىندىگىن دە ەسكەرۋىمىز كەرەك. ياعني ون ءبىر جىلدىق ءبىلىم ءبىزدى ءوزىمىزدى باسقارۋعا، تارتىپكە باعىنۋعا ۇيرەتەدى. سول سەبەپتى، ءار نارسە ءوز ورنىمەن بولعانى ءجون. ال كوزى اشىق، كوكىرەگى وياۋ ازامات ەسەيگەن شاعىندا وزىنە لايىق جار تاڭدايدى.

ەڭ العاشقى ماحابباتتىڭ پارتادان باستالاتىنى راس. ول عاشىقتىق سەزىمىن ءوزىم دە وتكەردىم. ماڭگىلىككە ۇلاساتىنىنا سەنىپ، ءوز الەمىمدى قۇراستىردىم. الايدا ۇلكەن ومىرگە قادام باسقان كەزدە مۇنىڭ بارلىعى ۇمىت بولىپ، جۇرەگىڭنىڭ تۇكپىرىندە بۇعىپ قالاتىن ءتاتتى ەستەلىككە اينالدى. ەسەسىنە ومىرلىك تاجىريبەم بولىپ قالدى.

ال ءسىزدىڭ العاشقى ماحاببات تۋرالى ويىڭىز قانداي؟ ونىڭ ماڭگىلىككە ۇلاساتىنىنا سەنەسىز بە؟

massaget.kz

سوڭعى جاڭالىقتار