وسكەمەندە جالاقىسىن سۇراعان جۇمىسشىلاردى باسشىسى ىشكىش دەپ اتادى

None
None
استانا. قازاقپارات - وسكەمەندە مەملەكەتتىك ماڭىزى بار نىساندى سالىپ جاتقان جۇمىسشىلار شۋ شىعاردى دەپ حابارلايدى ك ت ك ارناسى.

ەكى اي بويى ىرگەتاستى قۇيىپ، قابىرعانى كوتەرگەن قۇرىلىسشىلار ۋاقىت كەلگەندە ماڭداي تەر اقىسىن الا الماي وتىر. باستاپقىدا رەسپۋبليكالىق بيۋدجەتتەن اقشا تۇسپەدى دەگەن فيرما باسشىسى كەيىن قاراماعىنداعى جىگىتتەردىڭ جالقاۋ ءارى ىشىمدىككە سالىنعان دەپ ايىپتاعان.

وسىلايشا قۇرىلىسشىلاردى كوك تيىن تولەمەي، جۇمىستان قۋماقشى.

وسكەمەندەگى ەڭ ءىرى قۇرىلىس الاڭىنا قۇرىلىسشىلار ەلىمىزدىڭ تۇكپىر- تۇكپىرىنەن جينالعان. مۇندا بىردەن كوپقاباتتى 9 عيماراتتىڭ قۇرىلىسى ءجۇرىپ جاتىر. جوعارى جالاقى، تەگىن جاتىن ورىن مەن تاماق بولادى دەگەن سوڭ ولار شىعىس وڭىرگە شۇعىل جەتىپتى.

«ءبىر اي بولدى اقشا دا كەلىسىم شارتتى دا بەرگەن جوق. بەرگەنى مىڭ تەڭگە. ونىمەن قالاي كۇن كورمەكپىن»، - دەيدى جۇمىسشىنىڭ ءبىرى.

قۇرىلىسقا مەملەكەتتەن قارجى دەر كەزىندە ءبولىنىپتى. ءبىراق جەرگىلىكتى مەردىگەر جۇمىسشىلارمەن ەسەپتەسۋگە اسىعار ەمەس. ال شاعىمدانعان 80 ادامنىڭ بارلىعى «بولات ي ك» فيرماسىندا جۇمىس ىستەپ كەلگەن.

«تولەگەنى 2 مىڭ، 5 مىڭ. بۇل ءبىر اپتادا بەرگەنى. قازىر 2-5 مىڭ اقشا ما؟ ءبىز وسىنداي اقشا تابۋعا كەلدىك پە؟ اركىمنىڭ بالا- شاعاسى بار، بارلىعىمىز قايعىرىپ ءجۇرمىز»، - دەيدى قۇرىلىسشى مۇرات جۇراقشىنوۆ.

ال قۇرىلىس كومپانياسىنىڭ باسشىسى ءوز ۇجىمىن ىشىمدىككە سالىنعان، ساۋساعىنىڭ ۇشىن قوزعالتۋعا دا ەرىنەدى دەپ ايىپتادى. سوندىقتان كەلىسىم- شارت جاساسىپ، اۋرەلەنۋدى ءجون كورمەپتى. قۇرىلىس الاڭىندا بولعانداردى سىناقتان وتكىزگەن ەكەن. ەندى سوڭىنا دەيىن شىداعانداردىڭ عانا جالاقىسىن تولەمەك.

«ىستەلگەن جۇمىس تۋرالى اكتتىنى وتكىزدىم. اقشانى اۋدارعان كەزدە كىسىلەرگە ايلىقتارىن تولەيمىن. ال شۋ شىعارعان كىسىلەر جۇمىستان شىعارىلعان ادامدار. قالعان 30 ادام جۇمىس ىستەپ جاتىر»، - دەدى «بولات ي ك» كومپانياسىنىڭ ديرەكتورى بولات بايمۇحان.

بۇل ىسپەن قازىر پوليتسيا جانە پروكۋراتۋرا اينالىسۋدا. قۇرىلىسشىلاردىڭ باسىم بولىگى توككەن تەرى ءۇشىن ءتيىستى تەڭگەسى تولەنگەنشە جۇمىستى جالعاستىرۋدان باس تارتىپ وتىر. ال قالعاندارى ەڭبەكاقىسىن الا سالا ءوز جونىمەن كەتپەكشى.

سوڭعى جاڭالىقتار